1. O oe fo‘i le atali‘i o le tagata ‘ia e avane mā oe se polo ma‘ai, ‘ia e avane mā oe se tafi a le sele ‘ava, ma tafi a‘i lou ulu ma lau ‘ava; ‘ia avane fo‘i mā oe se fua fa‘atautau e fua a‘i, ma e vaevae ai.
2. O lona tolu o vaega ‘e te sunua i le afi i le ‘a‘ai pe a ‘atoa aso e vagai ai; ‘e te ‘ave fo‘i le tasi ona vaega ma tipitipisoloina i le polo; o le isi ona tolu o vaega ‘e te fa‘ata‘ape‘apeina i le matagi; ‘ou te tō a‘e fo‘i le pelu e mulimuli atu i ai.
3. ‘E te ‘aumai ai fo‘i ni nai lauulu itiiti ma e fusi ai i lou pito ‘ofu.
4. ‘E te toe ‘aumai ai fo‘i nisi ma lafo i le afi ma e susunuina i le afi; e alu atu ai le afi i le ‘āiga uma o Isaraelu.
5. ‘Ua fa‘apea ‘ona fetalai mai o le Ali‘i le ATUA: O Ierusalema lenā ‘ua ‘ou tu‘uina o ia i totonu o nu‘u ‘ese ma nu‘u o vagavagaia o ia.
6. ‘Ua fouvale o ia i a‘u fa‘amasinoga, ‘ua sili ‘ona amio leaga i nu‘u ‘ese. ‘Ua fouvale fo‘i i a‘u tulafono e sili i nu‘u ‘ua vagavagaia o ia; auā ‘ua latou ‘ino‘ino i a‘u fa‘amasinoga ma latou le sāvavali i a‘u tulafono.
7. O le mea lea o lo‘o fa‘apea ‘ona fetalai mai ai o le Ali‘i le ATUA, ‘Ona ‘ua sili o lo ‘outou fa‘anunununu i nu‘u ‘ua vagavagaia ‘outou ma ‘ua ‘outou le sāvavali i a‘u tulafono ma ‘ua lē faia a‘u fa‘amasinoga ma ‘ua lē fai e tusa ma tu a nu‘u ‘ua vagavagaia ‘outou;
8. o le mea lea o lo‘o fa‘apea ‘ona fetalai mai ai o le Ali‘i le ATUA, Fa‘auta o a‘u, o a‘u lava, ‘ou te fa‘asaga atu ‘iā te oe ma ‘ou fa‘ao‘o atu sala ‘iā te oe i luma o nu‘u ‘ese.
9. ‘Ou te faia fo‘i ‘iā te oe se mea ‘ou te le‘i faia, ‘ou te lē toe faia fo‘i se mea fa‘apea, ‘ona o au mea uma e ‘inosia.
10. O le mea lea e ‘aina ai e tamā o latou atali‘i i totonu ‘iā te oe, e ‘aina fo‘i e atali‘i o latou tamā; ‘ou te fa‘ao‘oina fo‘i sala ‘iā te oe, ‘ou te fa‘ata‘ape‘apeina fo‘i i matāmatagi uma e o totoe uma o ‘iā te oe.
11. O le mea lea o lo‘o fetalai mai ai le Ali‘i le ATUA, O lo‘o ola a‘u, e moni, ‘ona ‘ua leaga ‘iā te oe lo‘u malumalu i au mea leaga uma ma au mea e ‘inosia uma, o a‘u fo‘i ‘ou te fa‘ato‘aitiitiina oe, ‘ou te lē fa‘asao, ‘ou te lē fa‘apelepeleina lava.
12. E oti lona tolu o vaega o ‘iā te oe i le fa‘ama‘i, e fa‘aumatia fo‘i i le oge i latou i totonu ‘iā te oe; e fasia fo‘i le tasi vaega i le pelu i mea uma e si‘osi‘oina ai oe; ‘ou te fa‘ata‘ape‘apeina le isi ona tolu o vaega i matāmatagi uma, ‘ou te tō a‘e fo‘i le pelu e mulimuli atu ‘iā te i latou.
13. ‘Ou te fa‘auma atu lo‘u ita, e tumau fo‘i lo‘u tigā tele ‘iā te i latou, ‘ona to‘a filemū ai lea o a‘u; ‘ona iloa ai lea o i latou, o a‘u o le ALI‘I na ‘ou fai atu i lo‘u fuā ‘ina ‘ua ‘ou fa‘auma atu lo‘u ita tele ‘iā te i latou.
14. ‘Ou te faia fo‘i oe ma mea ‘ua fa‘atafunaina ma luma i nu‘u ‘ese e vagavagaia oe, i luma o i latou uma o ē ui ane ai.
15. E fai fo‘i oe ma luma ma ‘upu fāifai ma fa‘aa‘oa‘o ma mea e ofo ai i nu‘u ‘ese e vagavagaia oe, ‘ina ‘ua ‘ou fa‘ao‘oina sala ‘iā te oe i lo‘u ita ma lo‘u tigā, ma a‘oa‘iga o matuā ogo lava. O a‘u o le ALI‘I o lē fai atu ai.