1. ‘Ona toe fa‘afo‘i lea o ia ‘iā te a‘u i le faitoto‘a o le fale; fa‘auta fo‘i, ‘ua alu a‘e le vai i lalo o le faitoto‘a o le fale i sasa‘e; auā na fa‘asaga ona lumāfale i sasa‘e, na alu ifo fo‘i le vai na i lalo mai le itū taumatau o le fale i le itū i saute o le fatafaitaulaga.
2. ‘Ona ia ‘aveina atu lea o a‘u i le ala o le faitoto‘a i le itū i matū, na ia ta‘ita‘i fa‘ata‘amilo ‘iā te a‘u i le ala i tua i le faitoto‘a aupito i tua i le ala e fa‘asaga i sasa‘e; fa‘auta fo‘i, ‘ua tafe atu ai le vai i le itū taumatau.
3. ‘Ua alu ane i le itū i sasa‘e le tagata sa i lona lima le manoa, ‘ona ia fuatia lea o kupita e afe, ‘ona ia ta‘ita‘iina lea o a‘u i le tasi itū o le vai; ‘ua gata le vai i tapuvae.
4. ‘Ua ia toe fuatia se afe o kupita, ‘ona ia ta‘ita‘iina lea o a‘u i le tasi itū o le vai; ‘ua gata le vai i tulivae, ‘Ua ia toe fuatia se afe o kupita, ‘ua ia ta‘ita‘iina fo‘i o a‘u i le tasi itū; ‘ua gata le vai i le sulugātiti.
5. ‘Ua ia toe fuatia se afe o kupita; ‘ua ‘avea ma vaitafe ‘ou te lē toe mafai ‘ona asa; auā ‘ua loloto le vai, o le vai e ‘a‘au ai, o le vaitafe e lē mafai ‘ona asa.
6. ‘Ua ia fai mai fo‘i ‘iā te a‘u, “Le atali‘i e o le tagata, ‘ua e iloa ‘ea?”‘Ona ia ta‘ita‘iina lea o a‘u, ma fa‘afo‘i mai ‘iā te a‘u i le ‘auvai o le vaitafe.
7. ‘Ua ‘ou toe fo‘i, fa‘auta, o la‘au e tele lava i le ‘auvai o le vaitafe, o i le tasi itū ma le isi itū.
8. ‘Ona fai mai lea o ia ‘iā te a‘u, “E tafe atu ia vai i le itū i sasa‘e ma tafe ifo i le lau‘ele‘ele mafolafola ma o‘o i le sami; a o‘o atu i le sami, ‘ona fa‘amāgaloina ai lea o le suāsami.
9. O mea ola uma fo‘i, a fetolofi i mea uma e o‘o i ai le vaitafe, e ola ia; e matuā tele fo‘i i‘a auā e o‘o i ai ia vai ma fa‘amāgaloina ai; e ola ai fo‘i mea uma e o‘o atu i ai le vaitafe.
10. E tutū ai fo‘i ē fai faiva, e pau mai i Enokati e o‘o i Enokelima; e fai ma mea e fofola ai ‘upega; o ona i‘a fo‘i e uiga ‘ese‘ese, e pei o i‘a o le sami tele, e matuā tele lava.
11. A o ana mea e palapalā ma ona fusi e lē toe fa‘amāgaloina; ‘ae tu‘uina atu i le masima.
12. O le ‘auvai o le vaitafe i lea itū ma lea itū, e tutupu ai la‘au uma e ‘aina, e le mamae o latou lau, e le uma lava o latou fua; ta‘itasi le masina ma lona fuata, auā e tafe atu o latou vai a‘i le malumalu; e fai fo‘i o latou fua ma mea e ‘ai ma o latou lau e fai ma vaila‘au.”
13. ‘Ua fa‘apea ‘ona fetalai mai o le Ali‘i le ATUA: O le tuā‘oi lenei tou te totofi ai mo ‘outou le lau‘ele‘ele, e fa‘atatau i itū‘āiga e sefulu ma le lua o Isaraelu; e lua tofi mo Iosefa.
14. Tou te fai tofi ai, o le tasi e tusa ma le tasi, o le mea na ‘ou si‘i ai lo‘u lima ‘ou te foa‘i atu ai i o ‘outou tamā; e maua fo‘i e ‘outou lenei lau‘ele‘ele e fai mo ‘outou tofi.
15. O le tuā‘oi fo‘i lenei o le lau‘ele‘ele i le itū i matū, e amata mai i le sami tele i le ala o Hetelona, i le mea e ui atu ai i Setata;
16. o Amato o Perota, o Seperimo, o lo‘o i le vā o le tuā‘oi o Tamaseko ma le tuā‘oi o Amato, o Hasaratikona, o lo‘o i le tuā‘oi o Haurana.
17. O lona tuā‘oi, e pau mai i le sami o Hasarenana le tuā‘oi o Tamaseko, mai le itū i matū e fa‘asaga i le itū i matū, ma le tuā‘oi o Amato. O le itū i matū lea.
18. O le itū i sasa‘e fo‘i tou te fuatia, e amata mai i Haurana ma Tamaseko ma Kiliata ma le lau‘ele‘ele o Isaraelu i Ioritana, e pau mai i le tuā‘oi i le sami i sasa‘e. O le itū i sasa‘e lea.
19. O le itū i saute e fa‘asaga i le itū i saute, e pau mai i Tamara, e pau mai i le vai o Meripa i Katesa i le alia e o‘o i le sami tele. O le itū lea i le i saute.