20. ‘Ua latou o‘o atu i nu‘u ‘ese, na latou o i ai, ‘ona ta‘uvaleina ai lea o lo‘u igoa pa‘ia ‘ona o i latou, ‘ina ‘ua fa‘apea ane ‘iā te i latou, “O le nu‘u lea o le ALI‘I, ‘ua latou ō mai nai lona lau‘ele‘ele.”
21. ‘Ae peita‘i na ‘ou alofa ‘ona o lo‘u igoa, pa‘ia, o lē na ta‘uvaleina e le ‘āiga o Isaraelu i nu‘u ‘ese na latou o i ai.
22. O le mea lea ‘ia e fai atu ai i le ‘āiga o Isaraelu, ‘Ua fa‘apea ‘ona fetalai mai o le Ali‘i le ATUA: ‘Ou te lē faia lea mea ‘ona o ‘outou, le ‘āiga o Isaraelu e, a o lo‘u igoa pa‘ia o lē ‘ua ‘outou ta‘uvaleina i nu‘u ‘ese ‘ua ‘outou ō i ai.
23. ‘Ou te fa‘apa‘iaina lo‘u igoa mamalu ‘ua ta‘uvaleina i nu‘u ‘ese, o lē ‘ua ta‘uvaleina lava e ‘outou i totonu ‘iā te i latou; e iloa ai fo‘i e nu‘u ‘ese o a‘u lava o le ALI‘I, o lo‘o fetalai mai ai le Ali‘i le ATUA, pe a ta‘upa‘iaina o a‘u ‘iā te ‘outou i o ‘outou luma.
24. Auā ‘ou te ‘avea ‘outou ai nu‘u ‘ese ma ‘ou fa‘apotopotoina ‘outou mai nu‘u ‘ese‘ese uma ma ‘ou ‘aumaia ‘outou i lo ‘outou lau‘ele‘ele.
25. ‘Ona ‘ou sausauina lea o ‘outou i le vai manino, ‘ona mamā ai lea o ‘outou; ‘ou te fa‘amamāina fo‘i ‘outou i lo ‘outou leaga uma ma a ‘outou tupua uma.
26. ‘Ou te avatu fo‘i ‘iā te ‘outou le loto fou ma ‘ou tu‘u i totonu ‘iā te ‘outou le agaga fou; ‘ou te ‘ave‘esea le loto ma‘a‘a a‘i o ‘outou tino ma ‘ou avatu ‘iā te ‘outou le loto ‘a‘ano.
27. ‘Ou te tu‘uina atu lo‘u Agaga i totonu ‘iā te ‘outou, tou te sāvavali ai i a‘u tulafono, tou te ‘ana‘ana fo‘i i a‘u fa‘amasinoga ma ‘outou faia.
28. Tou te nonofo fo‘i i le nu‘u na ‘ou foa‘iina atu i o ‘outou tamā; e fai fo‘i ‘outou mo‘u nu‘u, e fai fo‘i a‘u mo ‘outou Atua.
29. ‘Ou te fa‘aolaina fo‘i ‘outou a‘i lo ‘outou leaga uma; ‘ou te vala‘au fo‘i i le saito ma ‘ou fa‘atuputeleina, ‘ae ‘ou te lē tu‘u atu se oge ‘iā te ‘outou.
30. ‘Ou te fa‘atuputeleina fo‘i fua o la‘au ma mea e tutupu i le ‘ele‘ele, ‘ina ‘ia lē toe o‘o ‘iā te ‘outou le fa‘aluma mai o nu‘u ‘ese ‘ona o le oge.
31. ‘Ona ‘outou mānatunatu ai lea i o ‘outou lava ala leaga ma mea sa ‘outou faia e lē o i ai se lelei, tou te ‘ino‘ino ai lava ‘outou ‘iā te ‘outou ‘ona o a ‘outou amio leaga, ‘atoa ma a ‘outou mea e ‘inosia.
32. O lo‘o fetalai mai le Ali‘i le ATUA, ‘Ia iloa e ‘outou ‘ou te lē faia ia mea ‘ona o ‘outou; ‘ia ‘outou mamā ma ‘ia ‘outou māsiasi ‘ona o ‘outou ala, le ‘āiga o Isaraelu.
33. ‘Ua fa‘apea ‘ona fetalai mai o le Ali‘i le ATUA: O le aso ‘ou te fa‘amamāina ai ‘outou ‘iā ‘outou amio leaga uma, o a‘u e ‘ainā ai a ‘outou ‘a‘ai, e atiina a‘e fo‘i mea ‘ua fa‘atafunaina.
34. E galueaina fo‘i le lau‘ele‘ele sa fa‘atafunaina, sa fa‘atafunaina lava i luma o i latou uma ē na ui ane ai.
35. ‘Ona latou fai ane lea, “O lenei lau‘ele‘ele sa fa‘atafunaina, ‘ua ‘avea e pei o le fa‘ato‘aga o Etena; o ‘a‘ai fo‘i sa gaogao ma fa‘atafunaina ma lepetia, ‘ua nofo ‘olo i latou ‘ua ‘ainā.”