12. ‘Ou te fa‘afeoa‘iina tagata i luga ‘iā te ‘outou, o lo‘u lava nu‘u o Isaraelu; e fai oe mo latou, e fai fo‘i oe mo latou tofi, ‘e te lē toe fa‘aumatia lava tagata a‘i ‘iā te i latou.
13. ‘Ua fa‘apea ‘ona fetalai mai o le Ali‘i le ATUA: ‘Ua latou fa‘apea atu ‘iā te ‘outou, “O oe ‘ua e ‘ai tagata ma ‘ua e fa‘aumatia tagata o ou nu‘u;”
14. o le mea lea ‘e te lē toe ‘ai tagata ai lava, ‘e te lē toe fa‘aumatia fo‘i tagata a‘i ou nu‘u, o lo‘o fetalai mai ai le Ali‘i le ATUA.
15. O a‘u fo‘i e lē toe lagona ai le fa‘amasiasiga o nu‘u ‘ese, e lē toe o‘o atu lava ‘iā te oe le fa‘aluma mai o tagata, e lē toe fa‘atausuaiina fo‘i ou nu‘u, o lo‘o fetalai mai ai le Ali‘i le ATUA.
16. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
17. Le atali‘i e o le tagata, sa mau le ‘āiga o Isaraelu i lo latou lava lau‘ele‘ele, ‘ona leaga ai lea ‘iā te i latou ‘iā latou amio ma a latou mea na fai; sa tusa a latou amio i o‘u luma ma le leaga o le fafine ‘ua nofo ‘ese.
18. O le mea lea na ‘ou sasa‘a ai lo‘u ita i luga ‘iā te i latou, ‘ona o le toto na latou fa‘amaligiina i luga o le ‘ele‘ele, ‘ona o a latou tupua fo‘i na latou fa‘aleagaina ai le nu‘u.
19. Na ‘ou fa‘ata‘ape‘ape fo‘i ‘iā te i latou i nu‘u ‘ese ma fa‘asalalauina i latou i nu‘u ‘ese‘ese; na ‘ou fa‘asala fo‘i ‘iā te i latou e tusa ma o latou ala, e tusa fo‘i ma a latou mea na fai.
20. ‘Ua latou o‘o atu i nu‘u ‘ese, na latou o i ai, ‘ona ta‘uvaleina ai lea o lo‘u igoa pa‘ia ‘ona o i latou, ‘ina ‘ua fa‘apea ane ‘iā te i latou, “O le nu‘u lea o le ALI‘I, ‘ua latou ō mai nai lona lau‘ele‘ele.”
21. ‘Ae peita‘i na ‘ou alofa ‘ona o lo‘u igoa, pa‘ia, o lē na ta‘uvaleina e le ‘āiga o Isaraelu i nu‘u ‘ese na latou o i ai.
22. O le mea lea ‘ia e fai atu ai i le ‘āiga o Isaraelu, ‘Ua fa‘apea ‘ona fetalai mai o le Ali‘i le ATUA: ‘Ou te lē faia lea mea ‘ona o ‘outou, le ‘āiga o Isaraelu e, a o lo‘u igoa pa‘ia o lē ‘ua ‘outou ta‘uvaleina i nu‘u ‘ese ‘ua ‘outou ō i ai.
23. ‘Ou te fa‘apa‘iaina lo‘u igoa mamalu ‘ua ta‘uvaleina i nu‘u ‘ese, o lē ‘ua ta‘uvaleina lava e ‘outou i totonu ‘iā te i latou; e iloa ai fo‘i e nu‘u ‘ese o a‘u lava o le ALI‘I, o lo‘o fetalai mai ai le Ali‘i le ATUA, pe a ta‘upa‘iaina o a‘u ‘iā te ‘outou i o ‘outou luma.
24. Auā ‘ou te ‘avea ‘outou ai nu‘u ‘ese ma ‘ou fa‘apotopotoina ‘outou mai nu‘u ‘ese‘ese uma ma ‘ou ‘aumaia ‘outou i lo ‘outou lau‘ele‘ele.
25. ‘Ona ‘ou sausauina lea o ‘outou i le vai manino, ‘ona mamā ai lea o ‘outou; ‘ou te fa‘amamāina fo‘i ‘outou i lo ‘outou leaga uma ma a ‘outou tupua uma.
26. ‘Ou te avatu fo‘i ‘iā te ‘outou le loto fou ma ‘ou tu‘u i totonu ‘iā te ‘outou le agaga fou; ‘ou te ‘ave‘esea le loto ma‘a‘a a‘i o ‘outou tino ma ‘ou avatu ‘iā te ‘outou le loto ‘a‘ano.
27. ‘Ou te tu‘uina atu lo‘u Agaga i totonu ‘iā te ‘outou, tou te sāvavali ai i a‘u tulafono, tou te ‘ana‘ana fo‘i i a‘u fa‘amasinoga ma ‘outou faia.
28. Tou te nonofo fo‘i i le nu‘u na ‘ou foa‘iina atu i o ‘outou tamā; e fai fo‘i ‘outou mo‘u nu‘u, e fai fo‘i a‘u mo ‘outou Atua.
29. ‘Ou te fa‘aolaina fo‘i ‘outou a‘i lo ‘outou leaga uma; ‘ou te vala‘au fo‘i i le saito ma ‘ou fa‘atuputeleina, ‘ae ‘ou te lē tu‘u atu se oge ‘iā te ‘outou.
30. ‘Ou te fa‘atuputeleina fo‘i fua o la‘au ma mea e tutupu i le ‘ele‘ele, ‘ina ‘ia lē toe o‘o ‘iā te ‘outou le fa‘aluma mai o nu‘u ‘ese ‘ona o le oge.