5. Auā ‘ua ‘iā te oe le itatu‘u ma ‘ua e tu‘uina atu le fānauga a Isaraelu i le malosi o le pelu i ona po o lo latou malaia, o ou po fo‘i na i‘u ai le amio leaga.
6. O le mea lea o lo‘o fetalai mai ai le Ali‘i le ATUA, ‘Ou te ola a‘u, ‘ou te tu‘uina atu oe i le toto, e tuliloa fo‘i le toto ‘iā te oe; na e le ‘ino‘ino i le toto, o lea e tuliloa ai le toto ‘iā te oe.
7. ‘Ou te matuā fa‘atafunaina le mauga o Seira, ma ‘ou fa‘aumatia o ia o lē alu atu i ai, ‘atoa ma lē toe fo‘i mai.
8. ‘Ou te fa‘atūtūmuina fo‘i ona mauga i ona tagata ‘ua fasia; o ou mauga ma ou vanu ma ou vaitafe uma, e pa‘u‘ū ai i latou o ē ‘ua fasia i le pelu.
9. ‘Ou te fa‘atafunaina oe e fa‘avavau, e lē toe ‘ainā ou ‘a‘ai; ‘ona ‘outou iloa ai lea o a‘u lava o le ALI‘I.
10. ‘Ua e fa‘apea, “O ia nu‘u e lua ma o la lau‘ele‘ele e lua e fai mo‘u, matou te nonofo ai;” ‘ae peita‘i ‘ua i ai le ALI‘I.
11. O le mea lea ‘ua fetalai mai ai le Ali‘i le ATUA, ‘Ou te ola a‘u, ‘ou te faia ‘iā te oe e tusa ma lou ita, e tusa fo‘i ma lou matau‘a na e faia i lou ‘ino‘ino ‘iā te i latou; ‘ou te fa‘ailoa atu fo‘i o a‘u ‘ua ‘iā te i latou, pe a ‘ou fa‘asalaina oe.
12. ‘Ona e iloa ai lea o a‘u lava o le ALI‘I, ‘ua ‘ou fa‘alogoina au ‘upu fāifai uma ‘ua e fai atu ai i mauga o Isaraelu, ‘ua fa‘apea, “‘Ua fa‘atafunaina ia, ‘ua tu‘uina mai ‘iā te i matou e fai ma mea e ‘ai.”
13. ‘Ua ‘outou tautala fa‘asausili ‘iā te a‘u, ‘ua fa‘ateleina fo‘i a ‘outou ‘upu ‘iā te a‘u; ‘ua ‘ou fa‘alogo ai lava.
14. ‘Ua fa‘apea ‘ona fetalai mai o le Ali‘i le ATUA: A ‘oli‘oli le lalolagi uma, ‘ou te fa‘atafunaina oe.
15. E pei ‘ona e ‘oli‘oli ‘ina ‘ua fa‘atafunaina o le tofi o le ‘āiga o Isaraelu, e fa‘apea ‘ona ‘ou faia ‘iā te oe; e fa‘atafunaina oe le mauga o Seira, ‘atoa ma Etoma uma, o le nu‘u uma lava; ‘ona latou iloa ai lea o a‘u lava o le ALI‘I.#