11. Auā ‘ua fa‘apea ‘ona fetalai mai o le Ali‘i le ATUA:E o‘o atu le pelu a le tupu o Papelonia ‘iā te oe.
12. ‘Ou te fasiotia le vao tagata ‘ua ‘iā te oe i pelu a ē malolosi,o ē ‘ua mata‘utia i nu‘u, o i latou uma;latou te fa‘aumatia le mamalu o Aikupito;e fano fo‘i lona vao tagata.
13. ‘Ou te fa‘aumatia fo‘i ana manu uma a‘i tafatafa o vai tetele;e lē toe fa‘agāepuina lava e vae o tagata,e le fa‘agāepuina fo‘i e atigivae o manu.
14. ‘Ona ‘ou fa‘ato‘aina ai lea o latou vai ‘ia manino,ma ‘ou fa‘atāfeina o latou vaitafe fa‘apei o le suāu‘u,o lo‘o fetalai mai ai le Ali‘i le ATUA.
15. A ‘ou fa‘atafunaina le nu‘u o Aikupitoma ‘ua aunoa le nu‘u ma mea sa tumu ai,a ‘ou fasiotia i latou uma ‘ua nonofo ai,‘ona latou iloa ai lea o a‘u lava o le ALI‘I.
16. O le pese e aualofa a‘i lea latou te pepese a‘i ‘ona o ia.O tama fafine a nu‘u ‘ese latou te lagi le pese e aualofa a‘i ‘ona o ia;latou te lagi le pese e aualofa a‘i ‘ona o ia.‘Ona o Aikupito, ma lona vao tagata uma,o lo‘o fetalai mai ai le Ali‘i le ATUA.
17. O lona tausaga e tasi le sefulu ma le lua, o lona aso e tasi le sefulu ma le lima o le masina, na o‘o mai ai le afioga a le ALI‘I ‘iā te a‘u, ‘ua fa‘apea mai:
18. Le atali‘i e o le tagata,‘ia e auē ‘ona o le vao tagata o Aikupitoma lafo ‘iā te i latou o ia‘atoa ma tama fafine o nu‘u malolosii mea maulalo o le lalolagi,fa‘atasi ma ē ō ifo i le lua.
19. “‘Ua sili ‘ea oe ‘iā te ai i le matagofie?Alu ifo ia; ‘ia e ta‘atia fa‘atasi ma ē ‘ua lē peritomeina.”
20. Latou te pa‘u‘ū fa‘atasi ma ē ‘ua fasia i le pelu; ‘ua tu‘uina atu o ia i le pelu ma tosoina atu o ia ‘atoa ma lona vao tagata uma.
21. O ē ‘ua sili ‘ona malolosi i le ‘au malolosi latou te tautala mai totonu o seoli ‘iā te ia, ‘atoa ma ē fesoasoani ‘iā te ia; “‘Ua ō ifo i latou, ‘ua ta‘atia ‘ua lē peritomeina, ‘ua fasia i le pelu.”
22. O i ai Asuria ma ona tagata uma; ‘ua vagavagai ona tu‘ugamau ‘iā te ia ‘ua fasia uma i latou, ‘ua oti i le pelu.