9. E fa‘atafunaina ma fa‘agaogaoina le nu‘u o Aikupito; latou te iloa ai fo‘i o a‘u lava o le ALI‘I; auā na ia fai ane, “O lo‘u vaitafe le Naila, na ‘ou faia.”
10. Fa‘auta, o le mea lea ‘ou te fai ai oe mo‘u fili ‘atoa ma ou vaitafe; ‘ou te matua fa‘agaogaoina ma fa‘atafunaina le nu‘u o Aikupito, e pau atu i Mekatala e pau mai i Seveni, e o‘o lava i le tuā‘oi o Aitiope.
11. E lē ui atu ai vae o tagata; e lē ui atu ai fo‘i vae o manu; e lē ‘ainā fo‘i ia i tausaga e fagafulu.
12. ‘Ou te fa‘atafunaina le nu‘u o Aikupito fa‘atasi ma nu‘u ‘ua fa‘atafunaina; o ona ‘a‘ai fo‘i fa‘atasi ma ‘a‘ai ‘ua fa‘agaogaoina; e fa‘atafunaina ai i tausaga e fagafulu; ‘ou te fa‘ata‘ape‘apeina Aikupito i nu‘u ma ou fa‘asalalauina i latou i nu‘u ‘ese‘ese.