12. ‘Ou te fa‘atafunaina le nu‘u o Aikupito fa‘atasi ma nu‘u ‘ua fa‘atafunaina; o ona ‘a‘ai fo‘i fa‘atasi ma ‘a‘ai ‘ua fa‘agaogaoina; e fa‘atafunaina ai i tausaga e fagafulu; ‘ou te fa‘ata‘ape‘apeina Aikupito i nu‘u ma ou fa‘asalalauina i latou i nu‘u ‘ese‘ese.
13. A ‘ua fa‘apea ‘ona fetalai mai o le Ali‘i le ATUA, A mavae tausaga e fagafulu, ‘ona ‘ou fa‘apotopotoina lea o Aikupito ai nu‘u na fa‘ata‘ape‘apeina ai i latou.
14. ‘Ou te fa‘aea le tāfeaga o Aikupito ma ‘ou fa‘afoisia i latou i le nu‘u o Patoro, o le nu‘u o lo latou tupu‘aga, e ‘avea fo‘i i latou i lea mea ma mālō fa‘atauva‘a.
15. E sili ‘ona fa‘atauva‘a ia i mālō, e lē toe fa‘amaualuga ia i nu‘u; auā ‘ou te fa‘ato‘aitiitiina i latou, ‘ia latou le toe pule i nu‘u.
16. E lē toe fai fo‘i i latou ma fa‘atuatuaga o le ‘āiga o Isaraelu, e fa‘amanatuina ai a latou amio leaga i lo latou fa‘asaga atu i ai; ‘ae iloa e i latou o a‘u lava o le Ali‘i le ATUA.
17. O lona lua o sefulu ma le fitu o tausaga, o lona masina muamua, o le aso muamua o le masina, na o‘o mai ai le afioga a le ALI‘I ‘iā te a‘u, ‘ua fa‘apea mai:
18. Le atali‘i e o le tagata, na pule Nepukanesa le tupu o Papelonia i lana itūtau‘a ia latou faia le galuega tele i Turo; na tutula ai ulu uma, na fatuamoa fo‘i o latou ‘ua; ‘ae leai se totogi ‘iā te ia ma lana itūtau‘a i Turo i le galuega na ia fai ai.
19. O le mea lea ‘ua fa‘apea ‘ona fetalai mai ai o le Ali‘i le ATUA, Fa‘auta, ‘ou te avatu ‘iā Nepukanesa le tupu o Papelonia le nu‘u o Aikupito; na te ‘avea lona vao tagata, na te vetea fo‘i le vete ma faoa le ‘oloa; e fai fo‘i ia ma totogi i lana itūtau‘a.
20. ‘Ua ‘ou avatu ‘iā te ia le nu‘u o Aikupito ‘ona o le galuega na ia faia; auā na latou galulue mo a‘u, ‘ua fetalai mai ai le Ali‘i le ATUA.