1. ‘Ua o‘o mai fo‘i le afioga a le ALI‘I ‘iā te a‘u, ‘ua fa‘apea mai:
2. Le atali‘i e o le tagata, o fafine e to‘alua, o tama a le fafine to‘atasi,
3. na la talitane i Aikupito; na la talitane a o teine muli i lā‘ua; na ‘omia ai o lā‘ua susu; na tatao ai susu o lā‘ua o taupou.
4. O la igoa fo‘i, o Aola le matua ma Aolipa lona uso; na fai fo‘i i lā‘ua ma a‘u, na la fānanau fo‘i tama tane ma tama teine. A o lā‘ua igoa, o Aola o Samaria lea, o Aolipa o Ierusalema lea.
5. Na mulilua Aola ‘ina o fai ma a‘u; na ia tu‘inanau atu fo‘i i ē na manana‘o ‘iā te ia, o Asuria o ē vāvā lalata ma ia.
6. ‘Ua ‘o‘ofu i latou i ‘ofu uli, o ta‘ita‘i ma faipule, o taulele‘a ‘aulelei i latou uma, o ‘au o ti‘eti‘e i solofanua.
7. Na ia talitane ‘iā i latou, o i latou uma e aupito sili i tagata o Asuria ma i latou uma na ia tu‘inanau i ai; na fa‘aleagaina o ia e ia ‘iā latou tupua uma.
8. Na ia le tu‘ua lona talitane mai Aikupito; auā na latou momoe ma ia ‘ina o teine muli, na latou tatao fo‘i ona susu o taupou o ia ma sasa‘a a latou faita‘aga i luga ‘iā te ia.
9. O le mea lea na ‘ou tu‘uina atu ai o ia i lima o ē na manana‘o ‘iā te ia, o lima lava o tagata o Asuria, na ia tu‘inanau i ai.
10. O i latou na latou fa‘atelenoa ‘iā te ia; na latou ‘ave fo‘i ana tama tane ma ana tama teine; na latou fasioti fo‘i ‘iā te ia i le pelu, ‘ona logologoā lea o ia i fafine ‘ina ‘ua latou fa‘asalaina o ia.
11. ‘Ua iloa e lona uso o Aolipa, ‘ona fa‘asili lea e ia o lona tu‘inanau i le tu‘inanau o lona uso ma lona talitane na sili i le talitane o lona uso.
12. Na ia tu‘inanau i tagata o Asuria, o ē vāvā lalata ma ia, o ta‘ita‘i ma faipule o lo‘o ‘o‘ofu fa‘amatagofie lava, o ‘au o ti‘eti‘e i solofanua, o taulele‘a ‘aulelei i latou uma.
13. ‘Ona ‘ou iloa lea ‘ua leaga o ia, ‘ua tasi lava lo lā‘ua ala.
14. ‘Ua fa‘ateleina e ia lona talitane; auā na ia iloa tane na tusia i le pā, o fa‘atagata fo‘i o Kaletaia, ‘ua tusia i le vali mūmū,
15. ‘ua fusia o latou sulugātiti i fusi, ‘ua i o latou ulu o pulou lanu ‘ese‘ese, e tino mai i ali‘i ta‘ita‘i ‘au i latou uma, e pei o tagata Papelonia o Kaletaia ia, o le nu‘u na fānau ai i latou.
16. ‘Ua ia va‘ai atu i ai, ‘ona ia tu‘inanau atu ai lea ‘iā te i latou; na ia ‘a‘auina atu fo‘i ‘au‘auna ‘iā te i latou i Kaletaia.