8. E le‘i avatu se mea e ‘aumai ai se totogi fa‘asili, e le‘i talia se mea e fa‘asili, ‘ua fa‘afo‘i lona lima a‘i le amioletonu ma ‘ua fai fa‘amasinoga tonu i lea tagata ma lea tagata.
9. ‘Ua ia savali i a‘u tulafono, ‘ua ‘ana‘ana i a‘u fa‘amasinoga; e faia ma le fa‘amaoni, ‘ua amiotonu o ia; e ola lava ia, o lo‘o fetalai mai ai le Ali‘i le ATUA.
10. ‘Āfai e fānaua e ia se atali‘i e sauā ma le fa‘amaligi toto ma ‘ua faia se tasi o ia mea,
11. ‘ua ia le faia fo‘i ia mea tatau uma, a ‘ua ‘ai i luga o mauga ma ‘ua fa‘aleagaina le avā a le tasi tagata.
12. ‘Ua ia fa‘asauā i lē ‘ua puapuagā ma lē ‘ua mativa, ‘ua ia fao mea, e le‘i toe avatu le mea na tu‘u fa‘afa‘atau, ‘ua tepa a‘e i tupua ma ‘ua fai mea e ‘inosia.
13. ‘Ua ia avatu mea e ‘aumai ai se totogi fa‘asili, ‘ua ia talia fo‘i mea e fa‘asili, pe ola ‘ea ia? E lē ola lava; ‘ua ia faia ia mea uma e ‘inosia, e matuā oti lava o ia; e ‘iā te ia lava lona toto.
14. Fa‘auta fo‘i, a fānaua e ia sona atali‘i, a va‘ai e ia i agasala uma e faia e lona tamā ma ‘ua mafaufau ma ‘ua lē faia o ia mea fa‘apea;
15. e le‘i ‘ai i luga o mauga, e le‘i tepa a‘e i tupua o le ‘āiga o Isaraelu, e le‘i fa‘aleagaina le avā a le tasi tagata,
16. e le‘i fa‘asauā fo‘i o ia i se tasi, e le‘i tāofia le mea na tu‘u fa‘afa‘atau, e le‘i faoa fo‘i se mea, a ‘ua foa‘i atu ana mea e ‘ai i lē fia ‘ai ma ‘ua fa‘a‘ofuina e ia lē ‘ua lē lavalavā.
17. ‘Ua ia fa‘afo‘i lona lima a‘i lē ‘ua puapuagātia, ‘ua lē talia se totogi fa‘asili, po o se mea e fa‘asili, ‘ua usiusita‘i i a‘u fa‘amasinoga ma savali i a‘u tulafono; e lē oti o ia ‘ona o le agasala a lona tamā, ‘ae ola lava ia.
18. A o lona tamā ‘ona ‘ua ia matuā fa‘asauā, ‘ua ia faoa mea a le tasi tagata ma ‘ua fai le mea e lē lelei i lona nu‘u, fa‘auta, e oti o ia i lana agasala.
19. A ‘ua ‘outou fai mai, “E lē tauia i se a i le atali‘i le agasala a le tamā?” ‘Āfai e faia e le atali‘i le amio tatau ma le amiotonu, ‘ua tausi i a‘u tulafono uma, ma ‘ua faia, e ola lava ia.
20. O le tagata e agasala e oti lava ia; e lē tauia le agasala a le tamā i le atali‘i, e lē tauia fo‘i le agasala a le atali‘i i le tamā; o le amiotonu a lē ‘ua amiotonu e i ona luga lava lea, o le amio leaga fo‘i a lē ‘ua amio leaga e i ona luga lava lea.
21. ‘Ae ‘āfai e liliu ‘ese lē ‘ua amio leaga ai ana agasala uma ‘ua na faia ma tausi i a‘u tulafono uma, ma faia e ia le amio tatau ma le amiotonu, e ola lava ia, e lē oti.
22. O ana solitulafono uma na ia faia e le ta‘uta‘ua ‘iā te ia; o lana amiotonu ‘ua ia faia, e ola ai o ia.