1. Le ALI‘I e, ‘ia e manatua le mea ‘ua o‘o ‘iā te i matou;‘inā e silasila mai ia, ma ‘ia e silafia le fa‘alumaina o i matou.
2. ‘Ua ‘avea lo matou tofi mo tagata ‘esema o matou fale mo nu‘u ‘ese.
3. ‘Ua mātuaoti i matou, ‘ua leai ni tamā;o matou tinā ‘ua pei o fafine ‘ua oti a latou tane.
4. ‘Ua matou feinu i vai ‘ua fa‘atauina i tupe;o la matou fafie ‘ua ‘aumaia i le fa‘atali.
5. ‘Ua fa‘asauāina i matou i le amo i o matou ua;‘ua lailoa i matou, ‘ua leai sina mapu ‘iā te i matou.
6. ‘Ua matou tu‘uina atu le lima ‘iā Aikupito ma Asuria,‘ina ‘ia mā‘o‘ona ai i mea e ‘ai.
7. ‘Ua agasala o matou tamā, ‘ua leai fo‘i i latou;a o i matou, ‘ua tau‘ave e i matou a latou sala.
8. ‘Ua pule ‘au‘auna ‘iā te i matou;‘ua leai se tasi e lavea‘i ‘iā te i matou a‘i o latou lima.
9. O le tōa‘i ‘ua matou maua ai la matou mea e ‘ai,‘ona o le pelu ‘ua i le vao.
10. ‘Ua mū o matou pa‘u e peiseaī se ‘ogāumu,‘ona ‘ua velavela o le oge.
11. ‘Ua latou fetoso fafine i Siona,o taupou fo‘i i ‘a‘ai o Iuta.
12. Na fa‘atautauina ali‘i i o latou lima;sa le āva i toeaina.
13. Na latou ‘aveina atu taulele‘a i ‘olo i ma‘aolo;na taupa‘ū fo‘i tama i ‘avegāfafie.
14. ‘Ua tu‘ua e toeaina o le faitoto‘a,o taulele‘a fo‘i ‘ua tu‘u a latou pese.
15. ‘Ua mavae le fiafia o matou loto;‘ua liua la matou siva ma fa‘anoanoa.
16. ‘Ua pa‘ū le paleali‘i i lo matou ulu, ‘oi talofa ‘iā te i matou nei,auā ‘ua agasala i matou.
17. O le mea lea ‘ua vaivai ai o matou loto;o mea ia na fa‘apouliuligia ai o matou mata.
18. Auā o le mauga o Siona ‘ua tu‘ufua,‘ua feoa‘i ai alope.
19. O oe, le ALI‘I e, e tumau oe e fa‘avavau;o lou nofoāli‘i e auga tupulaga lea.
20. Po o le a ‘ea le mea ‘e te fa‘agalogaloina ai i matou e fa‘avavau?‘E te tu‘ua ‘ea o i matou i aso e tele?
21. Le ALI‘I e, ‘ia e fa‘aliliuina o i matou ‘iā te oe,‘ona fa‘aliliuina ai lea o i matou;‘ia e fa‘afouina o matou aso e pei o anamua.
22. Auā ‘ua e matuā lafoa‘i ‘iā te i matou;‘ua to‘asā tele lava oe ‘iā te i matou.