2. ‘Ua matuā tagi o ia i le po, ‘ua i ai fo‘i i ona alafau o ona loimata;o i latou uma ē sa manana‘o ‘iā te ia ‘ua leai so latou e fa‘amafanafana ‘iā te ia;‘ua fa‘a‘ole‘ole ana uō uma ‘iā te ia, ‘ua ‘avea i latou ma ē ita ‘iā te ia.
3. ‘Ua tāfea Iuta ‘ona o le puapuagā ma le galuega tele;‘ua nofo o ia i nu‘u ‘ese, ‘ua lē maua e ia se mālōlōga;‘atoa uma ē na tuliloa ‘iā te ia ‘ua latou maua atu ‘iā te ia i mea vā apiapi.
4. ‘Ua fa‘anoanoa ala o Siona ‘ina ‘ua leai ni ē ō mai i le tausamiga;‘ua ta‘aligoligoa ona faitoto‘a uma; ‘ua mapuitigā ona ositaulaga,‘ua tigā ona taupou, ‘ua ogotia fo‘i o ia.
5. ‘Ua sili ē ‘ua fa‘asauā ‘iā te ia, ‘ua manuia ē ‘ua ita ‘iā te ia;auā ‘ua fa‘atigāina o ia e le ALI‘I ‘ona o le tele o lona solitulafono;‘ua ō ana tama i le tāfeaga i luma o ē ‘ua fa‘asauā.
6. ‘Ua mavae le matagofie uma o le tama fafine a Siona;o ona ali‘i ‘ua pei o ‘aila ‘ua lē maua se vao e ‘ai ai,‘ua latou ō ‘ua leai so latou malosi i luma o lē tuliloa mai.
7. O ona po o le puapuagā o Ierusalema ma lona agaleagaina‘ua manatua e ia ana mea e fiafia i ai sa ‘iā te ia i ona po anamua,‘ina o pa‘u‘ū ona tagata i le lima o lē na ita mai,a o leai sona fesoasoani; na iloa mai ē ‘ua ita ‘iā te ia,sa featani i latou i lona fa‘atafunaga.
8. ‘Ua matuā agasala Ierusalema;o le mea lea ‘ua fa‘anofo‘eseina ai o ia;‘atoa uma ē na vivi‘i atu ‘iā te ia ‘ua latou ta‘ufa‘atauva‘aina o ia,auā ‘ua latou iloa lona lē lavalavā o ia fo‘i ‘ua mapuitigā o ia ma ‘ua ‘alo i tua.
9. ‘Ua i ona pito ‘ofu lona leaga; ‘ua lē manatua e ia o lona i‘uga,o lea ‘ua matuā fa‘amaulaloina ai o ia;e leai sē fa‘amafanafana ‘iā te ia.“Le ALI‘I e, ‘inā silasila mai ia i lo‘u puapuagā,auā na fa‘asausili lē ‘ua ita mai.”
10. ‘Ua fa‘aloaloa o lē ‘ua ita mai o lona lima i ana mea fa‘afiafia uma;auā ‘ua iloa o ia e nu‘u ‘ese ‘ua ulufale atu i lona malumalu o ē na e poloa‘i i ai,‘aua ne‘i latou ō ane i lau fa‘apotopotoga.