1. Na ‘ou iloa le Ali‘i, o lo‘o tu i luga o le fatafaitaulaga ma ‘ua fa‘apea mai o ia: ‘Inā ta ia le la‘au fa‘alava o le faitoto‘a, ‘ia lūlūina ai o pou; ‘ia gaugau ai i luga o latou ulu uma; ‘ou te fasioti fo‘i i le pelu ē ‘ua totoe o i latou; ‘ai so latou e sola e lē sao ia, ‘ai so latou e sola ‘ese e lē lavea‘iina o ia.
2. ‘Āfai latou te ‘eli ‘ia o‘o i seoli, e ‘aumaia i latou e lo‘u lima a‘i lea mea, ‘āfai latou te fe‘ā‘ei i le lagi, ‘ou te ‘aveina ifo i latou a‘i lea mea.
3. ‘Āfai latou te lalafi i le tumutumu o Karamelu, ‘ou te su‘esu‘e ai ma ‘aumai ai i latou a‘i lea mea; ‘āfai fo‘i e lalafi i latou a‘i o‘u luma i le loloto o le sami, ‘ou te fai atu ai i le gata, ‘ona utia ai lea o i latou e ia.
4. ‘Āfai fo‘i e tāfea i latou i luma o ē e fai i latou ma fili, ‘ou te fai atu ai i le pelu, ‘ona fasiotia ai lea o i latou; ‘ou te fa‘asaga atu i ai, ‘ina ‘ia malaia o i latou, ‘ae lē ‘ona ‘ia manuia.
5. O le Ali‘i le ATUA o ‘au, o ia e pa‘i atu i le lau‘ele‘ele,‘ona liu suāvai ai lea,e fa‘anoanoa fo‘i i latou uma o ē nonofo ai.E matuā alu a‘e e pei o se vaitafe, e lofia o ia e pei o le vaitafe o Aikupito.
6. O ia lava o lē na te faia ona afio‘aga i le lagi,ma na fa‘avaeina lana fa‘aputugamea i le lalolagi.O lē na te vala‘auina i le suāsami,o le sami ma fa‘amaligi ai i le fogā‘ele‘ele.O le ALI‘I, o lona suafa lea.
7. O lo‘o fa‘apea mai le ALI‘I: Le fānauga a Isaraelu e, o le ‘ua pei o tagata Aitiope ‘ea ‘outou ‘iā te a‘u? Pe na lē ‘aveina a‘e Isaraelu e a‘u a‘i le nu‘u o Aikupito? O Filisitia fo‘i a‘i Kafetori ma Suria a‘i Kira?
8. Fa‘auta, ‘ua fa‘asaga fofoga o le Ali‘i le ATUA i le mālō amio leaga, ‘ou te fa‘aumatia ai le fogā‘ele‘ele; na o le ‘āiga o Iakopo ‘ou te lē matuā fa‘aumatia, o lo‘o fetalai mai ai le ALI‘I.