4. Auā o lo‘o fa‘apea mai le ALI‘I i le ‘āiga o Isaraelu: ‘Ia ‘outou sā‘ili mai ‘iā te a‘u, tou te ola ai.
5. ‘Ae ‘aua le sā‘ili ‘iā Peteli, ‘aua le o i Kilikala, ‘aua fo‘i le ui atu i Peresepa; auā e matuā tāfea Kilikala, e i‘u vale Peteli.
6. ‘Ia ‘outou sā‘ili i le ALI‘I, tou te ola ai, ‘ina ne‘i o‘o atu o ia pei se afi i le ‘āiga o Iosefa ma fa‘aumatia ai, e leai fo‘i se tasi i Peteli na te tineia.
7. O ‘outou o ē liliu le fa‘amasinoga i laena ma lafo i lalo le amiotonu i le ‘ele‘ele.
8. ‘Ia ‘outou sā‘ili,i lē na na faia Kima ma Kisila.O lē na te liua le ata o le oti i le taeaoma fa‘apouliuligia le ao peiseaī ‘ua po.O lē na te vala‘auina le suāsami o le samima liligi ifo ai i le fogā‘ele‘ele.O le ALI‘I o lona suafa lea.
9. O lē na te fa‘ao‘o fa‘afuase‘i atu le fa‘atafunaga i lē ‘ua malosi, ‘ona o‘o atu ai lea o le fa‘atafunaga i le ‘olo.
10. ‘Ua latou ita atu i lē ‘ua a‘oa‘i i le faitoto‘a ma ‘ua latou ‘ino‘ino i lē ‘ua tautala fa‘amaoni.
11. O lenei fo‘i, ‘ua ‘outou soli i lē ‘ua vaivai, mōna ‘ua ‘outou tali fo‘i ‘iā te ia o taulaga saito; o le mea lea e ui ‘ina faia e ‘outou o fale ma‘a talai, ‘ae tou te lē nonofo ai; ‘ua ‘outou totōina tōvine lelei ‘ae tou te lē inu uaina ai.
12. Auā ‘ua ‘ou iloa a ‘outou agasala ‘ua matuā tele ma a ‘outou amio e matuā leaga; o lo‘o fa‘asauā i lē ‘ua amiotonu, ‘ua talia se taui ma ‘ua fa‘afo‘i atu i ē ‘ua matitiva o i le faitoto‘a.
13. O le mea lea e fa‘alologo ai lē ‘ua poto i ia ona po auā e leaga ia ona po.
14. ‘Ia ‘outou sā‘ili i le lelei, ‘ae lē o le leaga, ‘ina ‘ia ola ai ‘outou; ‘ona i ai lea ‘iā te ‘outou o le ALI‘I o le Atua o ‘au, e pei ‘ona ‘outou fai mai ai.
15. ‘Ia ‘outou ‘ino‘ino i le leaga ‘ae loto atu i le lelei ma ‘ia ‘outou fa‘atumau le fa‘amasinoga i le faitoto‘a; atonu e alofa le ALI‘I le Atua o ‘au i ē ‘ua totoe ‘iā Iosefa.
16. O le mea lea o lo‘o fa‘apea mai ai le ALI‘I, le Atua o ‘au, o le Ali‘i lava: “E pā le lauaitu i ala uma lava;” latou te fa‘apea ane i ala tele uma, Auē! auē! latou te vala‘au fo‘i i lē galue i fanua ‘ia e fa‘anoanoa; ma ē ‘ua iloa pese e au alofa a‘i, ‘ia tagitu‘i i latou.
17. E pā fo‘i le lauaitu i tōvine uma, auā ‘ou te ui atu ‘iā te oe, o lo‘o fetalai mai ai le ALI‘I.
18. Talofa ‘iā te ‘outou o ē manana‘o i le aso o le ALI‘I. Se a ‘ea lona aogā ‘iā te ‘outou? O le aso o le ALI‘I, o le pouliuli lea, ‘ae lē o le malamalama.
19. E pei o le tagata ‘ua sola ‘ese i le leona, a ‘ua la fetaia‘i ma le urosa; pe ulufale atu i le fale ma toto‘o ai lona lima i le pā puipui, ona utia ai lea o ia i le gata.
20. E lē o le pouliuli ‘ea le aso o le ALI‘I, ‘ae lē malamalama; e pogisā lava, e leai sona pupula?
21. ‘Ua ‘ou ‘ino‘ino, ‘ua leaga ‘iā te a‘u o ‘outou tausamiga; ‘ou te lē fiafia i o ‘outou fa‘apotopotoga.
22. E ui ‘ina ‘outou ‘aumai ‘iā te a‘u o taulaga mū, ma a ‘outou taulaga i mea e ‘ai, ‘ou te lē talia; o le taulaga fa‘afetai ‘iā ‘outou manu pepeti, ‘ou te lē va‘ai atu i ai.
23. ‘Ia e ‘ave ‘ese ‘iā te a‘u le ta‘alili o ou pese; o le leo mālie fo‘i o au napeli ‘ou te lē fa‘alogo ai.