14. ‘Ia ‘outou sā‘ili i le lelei, ‘ae lē o le leaga, ‘ina ‘ia ola ai ‘outou; ‘ona i ai lea ‘iā te ‘outou o le ALI‘I o le Atua o ‘au, e pei ‘ona ‘outou fai mai ai.
15. ‘Ia ‘outou ‘ino‘ino i le leaga ‘ae loto atu i le lelei ma ‘ia ‘outou fa‘atumau le fa‘amasinoga i le faitoto‘a; atonu e alofa le ALI‘I le Atua o ‘au i ē ‘ua totoe ‘iā Iosefa.
16. O le mea lea o lo‘o fa‘apea mai ai le ALI‘I, le Atua o ‘au, o le Ali‘i lava: “E pā le lauaitu i ala uma lava;” latou te fa‘apea ane i ala tele uma, Auē! auē! latou te vala‘au fo‘i i lē galue i fanua ‘ia e fa‘anoanoa; ma ē ‘ua iloa pese e au alofa a‘i, ‘ia tagitu‘i i latou.
17. E pā fo‘i le lauaitu i tōvine uma, auā ‘ou te ui atu ‘iā te oe, o lo‘o fetalai mai ai le ALI‘I.
18. Talofa ‘iā te ‘outou o ē manana‘o i le aso o le ALI‘I. Se a ‘ea lona aogā ‘iā te ‘outou? O le aso o le ALI‘I, o le pouliuli lea, ‘ae lē o le malamalama.
19. E pei o le tagata ‘ua sola ‘ese i le leona, a ‘ua la fetaia‘i ma le urosa; pe ulufale atu i le fale ma toto‘o ai lona lima i le pā puipui, ona utia ai lea o ia i le gata.
20. E lē o le pouliuli ‘ea le aso o le ALI‘I, ‘ae lē malamalama; e pogisā lava, e leai sona pupula?
21. ‘Ua ‘ou ‘ino‘ino, ‘ua leaga ‘iā te a‘u o ‘outou tausamiga; ‘ou te lē fiafia i o ‘outou fa‘apotopotoga.
22. E ui ‘ina ‘outou ‘aumai ‘iā te a‘u o taulaga mū, ma a ‘outou taulaga i mea e ‘ai, ‘ou te lē talia; o le taulaga fa‘afetai ‘iā ‘outou manu pepeti, ‘ou te lē va‘ai atu i ai.
23. ‘Ia e ‘ave ‘ese ‘iā te a‘u le ta‘alili o ou pese; o le leo mālie fo‘i o au napeli ‘ou te lē fa‘alogo ai.
24. A ‘ia tafe ifo le fa‘amasinoga e pei o vai ma le amiotonu e pei o le vai e tafe tetele lava.
25. Le ‘āiga o Isaraelu e, pe na ‘outou ‘aumai ‘ea ‘iā te a‘u o taulaga ma taulaga i mea e ‘ai i le vao i tausaga e fagafulu.