6. E ilia ‘ea le pū i le ‘a‘ai, ‘ae lē atuatuvale ai tagata?E tupu ‘ea se malaia i le ‘a‘ai, ‘ae lē faia e le ALI‘I?
7. E lē faia lava se mea e le Ali‘i le ATUA, ‘ae fa‘aalia lona finagalo i ana ‘au‘auna o perofeta.
8. ‘Ua tagi le leona, po o ai se le fefe?‘Ua fetalai mai le Ali‘i le ATUA, po o ai sē le vavalo?
9. ‘Ia ‘outou tala‘iina atu i maota o Asetota ma maota i le nu‘u o Aikupito ma ‘ia ‘outou fa‘apea atu, “‘Ia ‘outou fa‘apotopoto mai i mauga o Samaria, ‘inā va‘ava‘ai atu ai i vāvāō tetele o i ai, ‘atoa ma sauāga o i ai.”
10. Auā o lo‘o fetalai mai le ALI‘I: Latou te lē iloa ‘ona fai mea tonu, o ē fa‘aputu i o latou maota o mea e maua i le sauā ma le vete.
11. O le mea lea o lo‘o fa‘apea mai ai le Ali‘i le ATUA, o lē ‘ua ita mai e fealua‘i o ia i le nu‘u; e ‘ave‘esea fo‘i e ia lou malosi a‘i ‘iā te oe, e vetea ou maota.
12. O lo‘o fa‘apea mai le ALI‘I: Fa‘apei ‘ona fao e le leoleo mamoe o ‘alaga e lua, po o se fasi taliga i le gutu o le leona, e fa‘apea ‘ona lavea‘iina o le fānauga a Isaraelu o ē nonofo i Samaria, i le pito moega ma Tamaseko fo‘i i le moega.
13. ‘Ia ‘outou fa‘alogologo ma fa‘ailoa atu i le ‘āiga o Iakopo, o lo‘o fa‘apea mai le Ali‘i le ATUA, o le Atua o ‘au.
14. O le aso ‘ou te taui atu ai agasala a Isaraelu ‘iā te ia, ‘ou te asiasi fo‘i i fatafaitaulaga i Peteli; e vavae‘eseina fo‘i nifo o fatafaitaulaga, ‘ona pa‘u‘ū ai lea i le ‘ele‘ele.
15. ‘Ou te taia le fale o le tausaga ma‘alili, ‘atoa ma le fale o le tausaga vevela; e fa‘aumatia fale nifo elefane, e mavae atu fo‘i o fale tetele, o lo‘o fetalai mai ai le ALI‘I.