1. ‘Ua vala‘au ‘iā Elisaia le avā a le tasi so‘o o le ‘au perofeta, ‘ua fa‘apea mai, “‘Ua oti lau ‘au‘auna o la‘u tane, ‘ua e silafia fo‘i sa mata‘u lau ‘au‘auna i le ALI‘I, a ‘ua sau lē ‘ua matou ‘aitalafu i ai, o le a na ‘ave i a‘u tama tane e to‘alua e fai mōna pologa.”
2. ‘Ona fai atu lea o Elisaia ‘iā te ia, “Se a ‘ea se mea ‘ou te faia ‘iā te oe? ‘Inā ta‘u mai ia ‘iā te a‘u, pe se a se mea o ‘iā te oe i le fale?”‘Ona tali mai ai lea o ia, “E leai se mea a lau ‘au‘auna fafine o i lo‘u fale, ‘ua na o le fagu suāu‘u lava.”
3. ‘Ona fai atu ai lea o ia, “‘Inā alu ia, ‘ia e nō ipu i tuā i tagata uma ‘ua lata mai ‘iā te oe, o ipu le susua, ‘aua le itiiti.
4. A ē ulufale ane, ‘ia e pupuni le faitoto‘a i ou tua ma tua o au tama, i le ē liligi atu i na ipu uma, ma tu‘u ‘ese le ‘ua tumu.”
5. ‘Ona alu ane ai lea o ia, ‘ua tapuni le faitoto‘a i ona tua ma tua o ana tama; ‘ona la ‘aumai ai lea o ipu ‘iā te ia, ‘ona liligi atu ai lea e ia.
6. ‘Ua tūtūmu ipu, ‘ona fai atu lea o ia i lana tama, “‘Ia toe ‘aumai se isi ipu ‘iā te a‘u;” ‘ona fai mai ai lea o ia ‘iā te ia, “E leai se toe ipu.” ‘Ona utu ai lea o le suāu‘u.
7. ‘Ona alu ai lea o ia, ‘ua ta‘u atu i le tagata o le Atua. ‘Ona fai mai ai lea o ia ‘iā te ia, “Alu ia, ‘inā fa‘atau atu le suāu‘u i le e taui atu i le tagata ‘ua ‘outou ‘aitalafu ai; a o mea ‘ua totoe ‘ia ola ai oe ma au tama.”
8. O le tasi aso na ui atu ai Elisaia i Sunema, sa i ai le tasi sa‘o tama‘ita‘i; na ia pulunaunau mai ‘iā te ia se‘i ‘ai. ‘Ona i‘u ai lea ‘ina afe so‘o ai o ia e ‘ai ai i ana malaga i lea ala.
9. ‘Ona fai atu ai lea o ia i lana tane, “Fa‘auta mai, ‘ua ‘ou iloa o le tagata pa‘ia o le Atua lenei, o le sau so‘o ‘iā te i tā‘ua.
10. ‘Ia tā faia se afeafe itiiti i luga e fai i le pā puipui o le fale; ‘ia tā tu‘u ai se moega mo ia ma se laulau ma se nofoa ma se tu‘ugālamepa; a sau fo‘i o ia ‘iā te i tā‘ua, i le alu ane i ai o ia.”
11. O le tasi aso na o‘o atu ai o ia i lea mea, ‘ona ulu ane lea i le afeafe, ‘ua ta‘oto ai.
12. ‘Ua fai atu o ia ‘iā Kiasi lana ‘au‘auna, “Vala‘au ia i lenā tama‘ita‘i Sunema.” ‘Ona vala‘au lea o ia ‘iā te ia, ‘ona tu mai ai lea o ia i ona luma.
13. ‘Ona fai atu lea o ia ‘iā te ia, “‘Ia e fai atu i ai, Fa‘auta, ‘ua tigāina oe ‘ona o i mā‘ua i nei sauniga uma, se a se mea e faia mo oe? pe ta‘u ‘ea oe i le tupu, po o le ali‘i e pule i ‘au?”‘Ona tali mai ai lea o ia, “‘Ou te nofo fa‘atasi ma lo‘u nu‘u.”
14. ‘Ona fai ane lea o ia, “Se a se mea e faia mo ia?”‘Ona tali mai ai lea o Kiasi, “E leai sana tama, ‘ua toeaina fo‘i lana tane.”
15. ‘Ona fai atu lea o ia, “Vala‘au atu ‘iā te ia.” ‘Ona vala‘au atu lea o ia ‘iā te ia, ‘ona tu mai ai lea o ia i le faitoto‘a.
16. ‘Ona fai atu lea o ia, “O lelā tausaga, ‘e te sapasapai ai i sau tama tane.”‘Ona tali mai lea o ia, “‘Aua, le ali‘i e, le tagata o le Atua, ‘aua ‘e te ‘ole‘ole mai i lau ‘au‘auna fafine.”
17. ‘Ona tō ai lea o le fafine, ‘ua fānau mai ai lana tama tane i lea tausaga, e fa‘atatau i le tau o le olaga sa fai atu ai Elisaia ‘iā te ia.