2. Na ia faia le amiotonu i luma o le ALI‘I, ‘ua ia savali fo‘i i le ala uma o Tavita lona tamā, e le‘i alu ‘ese ai lava ia i le itū taumatau po o le itū tauagavale.
3. O le sefulu ma le valu o tausaga o le nofoa‘iga a le tupu o Iosia na ‘auina ai e le tupu i le fale o le ALI‘I o Safana le atali‘i o Asalaia, le atali‘i ia o Mesulama, o le tusi‘upu, ‘ua fa‘apea atu,
4. “Alu a‘e ia ‘iā Hilikia le ositaulaga sili, na te faitauina tupe uma ‘ua ‘aumaia i le fale o le ALI‘I, o mea ‘ua fa‘aputuina mai i le nu‘u e i latou o ē leoleo i le faitoto‘a;
5. ma ‘ia latou avatu ai ‘iā te i latou o ē fai le galuega, o ē leoleo i le fale o le ALI‘I, latou te avatu ai ‘iā te i latou o ē fai le galuega i le fale o le ALI‘I; ‘ina ‘ia toe fa‘aso‘o mea ‘ua lepetia o le fale;
6. e avatu ai i tufuga ma tufuga ati fale ma ē ati pā, e fa‘atau a‘i fo‘i la‘au ma ma‘a talai, e fa‘aso‘o a‘i le fale.
7. ‘Ae peita‘i ‘ua lē fa‘amasinoina i latou i tupe na tu‘uina atu ‘iā te i latou, auā latou faia ma le fa‘amaoni lava.”
8. ‘Ua fai atu Hilikia le ositaulaga sili ‘iā Safana le tusi‘upu, “‘Ua ‘ou maua le tusi o le tulafono i le fale o le ALI‘I.” ‘Ona avatu ai lea o le tusi e Hilikia ‘iā Safana, ‘ua na faitau ai.
9. ‘Ona sau ai lea o Safana le tusi‘upu i le tupu, ‘ua tala mai i le tupu, ‘ua fa‘apea mai, “‘Ua sasa‘aina e au ‘au‘auna o tupe na i le fale, ‘ua tu‘uina atu fo‘i ‘iā te i latou o ē fai le galuega, o ē leoleo i le fale o le ALI‘I.”
10. ‘Ona ta‘u mai ai lea e Safana le tusi‘upu i le tupu, ‘ua fa‘apea mai, “‘Ua ‘aumai ‘iā te a‘u e Hilikia le ositaulaga o le tusi.” ‘Ona faitau ai lea e Safana i luma o le tupu.
11. ‘Ua fa‘alogo le tupu i ‘upu o le tusi o le tulafono, ‘ona saei ai lea e ia ona ‘ofu.
12. ‘Ona fai atu ai lea o le tupu ‘iā Hilikia le ositaulaga ma Aikamo le atali‘i o Safana ma Akapora le atali‘i o Mekaia ma Safana le tusi‘upu, ‘atoa ma Asaia le ‘au‘auna a le tupu, ‘ua fa‘apea atu,
13. “Ō ia ‘outou, ‘inā fesili atu i le ALI‘I mo a‘u, ma le nu‘u, ‘atoa ma Iuta uma lava i ‘upu o le tusi nei ‘ua maua, auā e tele lava le to‘asā o le ALI‘I ‘iā te i tatou, auā ‘ua lē fa‘alogo o tatou tamā i ‘upu o lenei tusi ‘ina ‘ia faia ‘ia tusa ma mea uma ‘ua tusia mai ai ‘iā te i tatou.”
14. ‘Ona ō atu ai lea o Hilikia le ositaulaga ma Aikamo ma Akapora ma Safana ma Asaia ‘iā Ulata le perofeta fafine le avā a Saluma le atali‘i o Tikeva, le atali‘i ia o Areasa, o lē na tausi i ‘ofu, (sa nofo o ia i Ierusalema i le mea e ta‘ua o le lua o ‘a‘ai;) ‘ua latou tautala ma ia.
15. ‘Ona fai mai ai lea o ia ‘iā te i latou, “O lo‘o fa‘apea ‘ona fetalai mai o le ALI‘I le Atua o Isaraelu, ‘Ia ‘outou fai atu i le tagata na ‘a‘auina mai ‘outou ‘iā te a‘u,
16. o lo‘o fa‘apea ‘ona fetalai mai o le ALI‘I, Fa‘auta, o le a a‘u ‘aumaia se malaia i lenei mea ‘atoa ma ē o nonofo ai, o ‘upu uma lava o le tusi na faitauina e le tupu o Iuta;
17. auā ‘ua latou tu‘ua a‘u ‘ae fa‘amū mea manogi i atua ‘ese, ‘ina ‘ia latou fa‘a‘ono‘ono mai ‘iā te a‘u i mea uma ‘ua faia e o latou lima; o le mea lea o le a mū ai lava lo‘u ita i lenei mea, e lē tineia lava.