7. ‘Ua ta‘oto fo‘i Asaraia fa‘atasi ma ona tamā, ‘ua latou tanu fo‘i ‘iā te ia fa‘atasi ma ona tamā, i le ‘a‘ai o Tavita; ‘ona soloa‘i ane ai lea o lona atali‘i o Iotama e fai ma tupu.
8. O le tolugafulu ma le valu o tausaga o Asaraia le tupu o Iuta na fai ma tupu Sakaria le atali‘i o Ierepoamo ‘iā Isaraelu i masina e ono i Samaria.
9. Na ia faia le amio leaga i luma o le ALI‘I, fa‘apei ‘ona faia e ona tamā; na lē te‘a ‘ese lava ia i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu.
10. ‘Ua fōua fo‘i o ia e Saluma le atali‘i o Iapese, ‘ua na fasi ‘iā te ia i luma o le nu‘u, ‘ua fasioti fo‘i ‘iā te ia; ‘ona fai ai lea o ia ma tupu ‘ua sui a‘i o ia.
11. O toe o mea na faia e Sakaria, fa‘auta, ‘ua tusia i le tusi o tala i nofoa‘iga a tupu o Isaraelu.
12. O le afioga lea a le ALI‘I na tulei atu ‘iā Ieu, ‘ua fa‘apea atu, “E nonofo ou atali‘i i le nofoāli‘i o Isaraelu e o‘o i le fa o augātagata. Na fa‘apea lava ‘ona taunu‘u.”
13. O le tolugafulu ma le iva o tausaga o Usia le tupu o Iuta na fai ai ma tupu Saluma le atali‘i o Iapese; o le masina ‘atoa fo‘i na fai ai o ia ma tupu i Samaria.
14. Auā na alu a‘e Manaema le atali‘i o Kati nai Tiresa, ‘ua o‘o i Samaria, ‘ua fasi ‘iā Saluma le atali‘i o Iapese i Samaria, ‘ua fasioti ‘iā te ia, ‘ona fai ai lea o ia ma tupu ‘ua sui a‘i o ia.
15. O toe o mea na faia e Saluma, ‘atoa ma le fouga na ia fou ai, fa‘auta, ‘ua tusia i le tusi o tala i nofoa‘iga a tupu o Isaraelu.
16. ‘Ona fasi ai lea e Manaema o Tipesa ma i latou uma sa i ai ma ona nu‘u e amata i Tiresa, auā na latou le tatala puipui ‘iā te ia ‘ua ia fasi ai; ‘ua ia fa‘atiau i fafine totō uma sa i ai.
17. O le tolugafulu ma le iva o tausaga o Asaraia le tupu o Iuta na fai ai Manaema le atali‘i o Kati ma tupu o Isaraelu i tausaga e sefulu i Samaria.