13. O le tolugafulu ma le iva o tausaga o Usia le tupu o Iuta na fai ai ma tupu Saluma le atali‘i o Iapese; o le masina ‘atoa fo‘i na fai ai o ia ma tupu i Samaria.
14. Auā na alu a‘e Manaema le atali‘i o Kati nai Tiresa, ‘ua o‘o i Samaria, ‘ua fasi ‘iā Saluma le atali‘i o Iapese i Samaria, ‘ua fasioti ‘iā te ia, ‘ona fai ai lea o ia ma tupu ‘ua sui a‘i o ia.
15. O toe o mea na faia e Saluma, ‘atoa ma le fouga na ia fou ai, fa‘auta, ‘ua tusia i le tusi o tala i nofoa‘iga a tupu o Isaraelu.
16. ‘Ona fasi ai lea e Manaema o Tipesa ma i latou uma sa i ai ma ona nu‘u e amata i Tiresa, auā na latou le tatala puipui ‘iā te ia ‘ua ia fasi ai; ‘ua ia fa‘atiau i fafine totō uma sa i ai.
17. O le tolugafulu ma le iva o tausaga o Asaraia le tupu o Iuta na fai ai Manaema le atali‘i o Kati ma tupu o Isaraelu i tausaga e sefulu i Samaria.
18. Na ia faia fo‘i le amio leaga i luma o le ALI‘I; o lona olaga uma e le‘i te‘a ‘ese ai lava i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu.
19. Na si‘i le tau‘a e Pula le tupu o Asuria i le nu‘u; a ‘ua avatu e Manaema o taleni ario e tasi le afe ‘iā Pula, ‘ina ‘ia na fesoasoani ‘iā te ia, ‘ina ‘ia uamau le mālō ‘iā te ia.
20. Na togi tu fo‘i e Manaema o tupe ‘iā Isaraelu, i tagata sili uma e tamao‘āiga, ‘ina ‘ia avatu ai i le tupu o Asuria, ‘ia tofu ona tagata ma sekeli ario e limagafulu. ‘Ona fo‘i atu ai lea o le tupu o Asuria, ‘ua lē toe nofo ai i le nu‘u.
21. O toe o mea na faia e Manaema ma mea uma na ia faia, o le‘i tusia ‘ea i le tusi o tala i nofoa‘iga a tupu o Isaraelu?
22. ‘Ua ta‘oto fo‘i Manaema fa‘atasi ma ona tamā; ‘ona soloa‘i ane ai lea o Pekasia lona atali‘i e fai ma tupu.
23. O le limagafulu o tausaga o Asaraia le tupu o Iuta na fai ai ma tupu Pekasia le atali‘i o Manaema ‘iā Isaraelu i Samaria e lua tausaga.
24. Na ia faia fo‘i le amio leaga i luma o le ALI‘I, na ia le te‘a ‘ese lava i agasala Ierepoamo le atali‘i o Nepata, o lē na fa‘atupu le agasala ‘iā Isaraelu.
25. A ‘ua fōua ia e Peka le atali‘i o Remalia o lana ‘ave ‘au, ‘ua ia fasioti fo‘i ‘iā te ia i Samaria i le ‘olo o i le fale o le tupu; o i latou ma Arekopa ma Arie, na ‘iā te ia fo‘i o tagata Kiliata o to‘alimagafulu; ‘ua ia fasioti lava ‘iā te ia, ‘ona fai ai lea o ia ma tupu ‘ua sui a‘i o ia.
26. O toe o mea na faia e Pekasia, ‘atoa ma mea uma na ia faia, fa‘auta, ‘ua tusia i le tusi o tala i nofoa‘iga a tupu o Isaraelu.
27. O le limagafulu ma le lua o tausaga o Asaraia le tupu o Iuta na fai ai ma tupu Peka le atali‘i o Remalia ‘iā Isaraelu i Samaria i tausaga e luafulu.
28. Na ia faia fo‘i le amio leaga i luma o le ALI‘I, na ia le te‘a ‘ese lava i agasala a Ierepoamo le atali‘i o Nepata, o lē na fa‘atupu le agasala ‘iā Isaraelu.