3. ‘Ona fai mai lea o Natano i le tupu, “O mea uma ‘ua e finagalo i ai, maliu ane ia, ma e faia, auā o lo‘o ‘iā te oe le ALI‘I.”
4. O lea lava po na tulei mai ai le afioga a le ALI‘I ‘iā Natano, ‘ua fa‘apea mai:
5. Alu ia, ‘e te fai atu i la‘u ‘au‘auna o Tavita: O lo‘o fa‘apea ‘ona fai mai le ALI‘I: ‘E te faia ‘ea e oe se fale mo a‘u ‘ou te nofo ai.?
6. Auā ‘ou te le‘i nofo i se fale talu mai le aso na ‘ou ‘aveina a‘e ai le fānauga a Isaraelu nai Aikupito, e o‘o i lenei lava aso; a ‘ua ‘ou fealua‘i i se fale ‘ie ma se fale fe‘avea‘i.
7. O mea uma na ‘ou fealua‘i ai ma le fānauga a Isaraelu uma, pe na ‘ou fai atu ai ‘ea se ‘upu i se tasi itū‘āiga o Isaraelu, na ‘ou poloa‘i e leoleo i lo‘u nu‘u o Isaraelu, e fa‘apea, “Se a le mea tou te lē fai ai se fale arasi mo a‘u?”
8. O lenei, ‘ia fa‘apea ‘ona e fai atu i la‘u ‘au‘auna o Tavita: O lo‘o fa‘apea ‘ona fetalai mai o le ALI‘I o ‘au, O a‘u na ‘ou ‘aumaia oe a‘i le lotoā mamoe, na e mulimuli atu i mamoe, ‘ina ‘ia faia oe ma ta‘ita‘i i lo‘u nu‘u o Isaraelu.
9. Sa ‘ou i ai fo‘i ‘iā te oe i mea uma na e alu i ai, ma ‘ou fa‘aumatia i ou luma ē na ita ‘iā te oe uma lava; na ‘ou faia fo‘i mo oe le igoa mamalu, pei o igoa o ali‘i tetele i le lalolagi.
10. ‘Ou te tu‘u atu fo‘i se mea e nofo ai lo‘u nu‘u o Isaraelu, ma ‘ou totōina i latou, e mau ai lava i lo latou lava nu‘u; e lē toe fa‘agae‘etia i latou, e lē toe fa‘asauā fo‘i ‘iā te i latou o ē amio leaga, e pei o anamua,