16. ‘Ou te fa‘atumauina lou ‘āiga ma lou mālō e fa‘avavau i ou luma; e mausalī lou nofoāli‘i e fa‘avavau.
17. E pei o nei ‘upu uma, ma nei mea uma ‘ua fa‘aalia mai, sa fa‘apea ‘ona tautala atu ai o Natano ‘iā Tavita.
18. ‘Ona alu atu lea o le tupu o Tavita ma nofo atu i luma o le ALI‘I; ‘ona fai atu ai lea o ia, “Lo‘u Ali‘i e, le ATUA, o ai ‘ea a‘u nei? O ai fo‘i lo‘u ‘āiga ‘ina ‘ua e fa‘ao‘o mai ‘iā te a‘u i lenei aso?
19. A o le mea itiiti lava lea ‘iā te oe, lo‘u Ali‘i e, le ATUA, a ‘ua e fetalai mai fo‘i i le ‘āiga o lau ‘au‘auna e o‘o i tupulaga amulī lava; lo‘u Ali‘i e, le ATUA e, e fa‘apenā ‘ea le masani a tagata?
20. Se a fo‘i se ‘upu e toe tautala atu ai Tavita ‘iā te oe Auā o oe lo‘u Ali‘i e, le ATUA, ‘ua e silafia lau ‘au‘auna.
21. ‘Ona o lau afioga, e tusa fo‘i ma lou finagalo ‘ua e faia nei mea tetele uma, e fa‘ailoa mai ai i lau ‘au‘auna.
22. O le mea lea e Sili ai oe le ALI‘I le Atua e; auā e leai sē tusa ma oe, e leai fo‘i se Atua na o oe lava, e tusa ma ‘upu uma na matou fa‘alogologo ai i o matou taliga.
23. O ai ‘ea se tasi nu‘u i le lalolagi, e tusa ma lou nu‘u o Isaraelu lava, na afio mai ai le Atua e lavea‘i ‘iā te i latou o ē fai mōna nu‘u, ia ta‘ua ai lona suafa, ia fai fo‘i mā ‘outou mea tetele ma le mata‘utia, ‘ona o lou nu‘u, i luma o ou tagata na e lavea‘iina mo oe nai Aikupito, o nu‘u ‘ese ‘atoa ma o latou atua?
24. ‘Ua e fa‘atumauina mo oe o lou nu‘u o Isaraelu e fai mou nu‘u e fa‘avavau; o oe fo‘i o le ALI‘I, ‘ua fai oe mo latou Atua.
25. O lenei, le ALI‘I le Atua e, o le afioga na e fetalai mai ai i lau ‘au‘auna ma lona ‘āiga ‘ia e fa‘atumau lea e fa‘avavau, ma e faia e pei ‘ona e fetalai mai ai;
26. ma ‘ia fa‘amamaluina lou suafa e fa‘avavau, o lo‘o fa‘apea ane, ‘O le ALI‘I o ‘au, o ia o le Atua o Isaraelu;’ o le ‘āiga fo‘i o lau ‘au‘auna o Tavita, ‘ia fa‘atumauina lea i ou luma.
27. Auā o oe le ALI‘I o ‘au, le Atua o Isaraelu ‘ua e fa‘aali mai i lau ‘au‘auna, ‘ua fa‘apea mai, ‘‘Ou te faia se ‘āiga mo oe;’ o le mea lea ‘ua manatu ai a‘u lau ‘au‘auna e tatalo ‘iā te oe i lenei tatalo.
28. “O lenei, lo‘u Ali‘i e, le ATUA, o oe lava o le Atua, o au afioga e fa‘amaoni lava ia; ‘ua e fetalai mai fo‘i i lau ‘au‘auna i nei mea lelei.
29. O lenei, ‘ia e finagalo ‘ia fa‘amanuia le ‘āiga o lau ‘au‘auna ‘ina ‘ia i ai i ou luma e fa‘avavau; auā o oe lo‘u Ali‘i e, le ATUA ‘ua e fetalai mai; o lau fa‘amanuia mai e manuia ai le ‘āiga o lau ‘au‘auna e fa‘avavau.”#