10. ‘Ou te tu‘u atu fo‘i se mea e nofo ai lo‘u nu‘u o Isaraelu, ma ‘ou totōina i latou, e mau ai lava i lo latou lava nu‘u; e lē toe fa‘agae‘etia i latou, e lē toe fa‘asauā fo‘i ‘iā te i latou o ē amio leaga, e pei o anamua,
11. e āfua mai i le aso na ‘ou tofia ai fa‘amasino e pule i lo‘u nu‘u o Isaraelu. ‘Ua maua fo‘i e oe le mapusaga mai ‘iā te a‘u i ē na ita ‘iā te oe uma lava; ‘ua ta‘u atu fo‘i e le ALI‘I ‘iā te oe, o le a faia e le ALI‘I sou ‘āiga.
12. A fa‘a‘atoaina ou aso, ma e ta‘oto fa‘atasi ma ou tamā, ‘ona ‘ou fa‘atūina ai lea o so lau fānau pe a mavae atu oe, e tupu mai ai ‘iā te oe, ‘ou te fa‘atumauina fo‘i lona mālō.
13. O ia lava na te faia se fale mo lo‘u igoa; ‘ou te fa‘atumauina fo‘i le nofoāli‘i o lona mālō e fa‘avavau.
14. E fai a‘u mōna tamā, e fai fo‘i o ia mo‘u atali‘i; a agasala o ia ‘ou te a‘oa‘i atu ‘iā te ia ma le sasa a tagata, ma ta a tagata;
15. ‘ae lē ‘ave‘eseina lo‘u alofa ‘iā te ia, pei ‘ona ‘ou ‘ave‘esea ‘iā Saulo, o lē na ‘ou ‘ave‘esea i o‘u luma.
16. ‘Ou te fa‘atumauina lou ‘āiga ma lou mālō e fa‘avavau i ou luma; e mausalī lou nofoāli‘i e fa‘avavau.
17. E pei o nei ‘upu uma, ma nei mea uma ‘ua fa‘aalia mai, sa fa‘apea ‘ona tautala atu ai o Natano ‘iā Tavita.
18. ‘Ona alu atu lea o le tupu o Tavita ma nofo atu i luma o le ALI‘I; ‘ona fai atu ai lea o ia, “Lo‘u Ali‘i e, le ATUA, o ai ‘ea a‘u nei? O ai fo‘i lo‘u ‘āiga ‘ina ‘ua e fa‘ao‘o mai ‘iā te a‘u i lenei aso?