5. ‘Ua ō atu atali‘i o Rimoni le Perota, o Rakapa ma Paana, ‘ua la o‘o atu i le fale o Isoposeta i le itū aso o vevela ai le la; sa ta‘oto o ia i lona moega i le tutonu o le la.
6. ‘Ua ō atu i lā‘ua i totonu o le fale e la‘u saito, ‘ua la tutu‘i ‘iā te ia i le manava; ‘ona sōsōla ai lea o Rakapa ma Paana lona uso;
7. auā ‘ua la ulu atu i le fale, a o ia, sa ta‘oto i lona moega i lona afeafe e ta‘oto ai o ia, ‘ua la fasi, ma fa‘aoti ‘iā te ia, ma vavae ‘ese lona ao; ‘ona la ‘ave lea o lona ao; ‘ua ‘atoa le po ‘ua la ui atu ai i le ala i le ‘ele‘ele laugatasi.
8. ‘Ua la ‘aumaia le ao o Isoposeta ‘iā Tavita i Heperona; ‘ona la fai mai lea i le tupu, “Fa‘auta i le ulu o Isoposeta le atali‘i o Saulo, na fai oe mōna fili, o lē na sā‘ili e fasioti ‘iā te oe, ‘ua taui atu e le ALI‘I ‘ona o oe le ali‘i le tupu, i lenei aso ‘iā Saulo ma lana fānau.”
9. ‘Ona tali atu lea o Tavita ‘iā Rakapa ma Paana lona uso, o atali‘i o Rimoni le Perota, ‘ua fai atu ‘iā te i lā‘ua, “O lo‘o soifua le ALI‘I, o lē na lavea‘i mai ‘iā te a‘u i puapuagā uma lava,
10. na ta‘u mai se tasi ‘iā te a‘u, o lo‘o fa‘apea mai, ‘Fa‘auta, ‘ua oti Saulo;’ na manatu o ia, na ia ‘aumai le tala lelei, ‘ona ‘ou pu‘e ai lea ‘iā te ia ma fasioti ‘iā te ia i Sekeleka, a o ia na manatu ‘ou te avatu se taui o lana tala.
11. A o lenei, o tagata amio leaga ‘ua la fasioti le tagata amiotonu i lona fale i luga o lona moega, ‘ou te lē taui atu ‘ea i lona toto ‘iā te ‘oulua, ma ‘ou fa‘aumatia ‘oulua i le nu‘u nei?”
12. ‘Ona fai atu lea o Tavita i taulele‘a, ‘ona latou fasioti ai lea ‘iā te i lā‘ua, ma ‘ua vavae ‘ese o la lima ma o la vae, ma tautauina i luga o le vailepa i Heperona; a o le ao o Isoposeta na latou ‘ave ia, ma tanu i le tu‘ugamau o Apineru i Heperona.#