12. ‘Ua tu o ia i luma o le fatafaitaulaga o le ALI‘I i luma o le fa‘apotopotoga uma o Isaraelu ma na fa‘aloaloa ona lima;
13. auā na faia e Solomona le tulaga ‘apamemea e lima kupita lona umi ma le lima o kupita lona lautele, ma le tolu o kupita lona maualuga ma ‘ua tu‘u ai i totonu o le lotoā; ‘ua tu fo‘i o ia i ona luga ma ‘ua to‘otuli i ona tulivae i luma o le fa‘apotopotoga uma o Isaraelu ma ‘ua fa‘aloaloa a‘e ona lima i le lagi,
14. ‘Ua fa‘apea atu fo‘i o ia, “Le ALI‘I e, le Atua o Isaraelu, e leai se Atua e tusa ma oe i le lagi, po o le lalolagi; o lo‘o tausia le feagaiga ma le alofa i au ‘au‘auna, o ē sāvavali i ou luma ma o latou loto ‘atoa;
15. o oe ‘ua e tausia i lau ‘au‘auna o Tavita lo‘u tamā o le mea na e fetalai mai ai ‘iā te ia; na e fetalai mai i lou fofoga, o lou ‘a‘ao fo‘i ‘ua e fa‘ataunu‘uina ai, e fa‘apei ‘ona fai i le aso nei.
16. O lenei fo‘i, le ALI‘I e, le Atua o Isaraelu, ‘ia e tausia mā lau ‘au‘auna o Tavita lo‘u tamā le mea na e fetalai mai ai ‘iā te ia, ‘ua fa‘apea mai, ‘E lē aunoa se tagata ‘iā te oe i o‘u luma e ti‘eti‘e i le nofoāli‘i o Isaraelu; tau lava ‘ina tausia e au fānau o latou ala, ‘ina ‘ia latou sāvavali i la‘u tulafono, e fa‘apei ‘ona e savali i o‘u luma.’
17. O lenei, le ALI‘I e, le Atua o Isaraelu, ‘ia e fa‘amaonia lau afioga na e fetalai mai i lau ‘au‘auna o Tavita.
18. “Pe moni ‘ea e afio le Atua ma tagata i le lalolagi? Fa‘auta, o le lagi ma le lagi o lagi e le ofi ai oe; e le atili ai ‘ea ‘ona e le ofi i lenei fale ‘ua ‘ou faia?
19. A ‘ia e liuliu alo mai i le tatalo a lau ‘au‘auna, ma lana ‘ai‘oi, le ALI‘I e, lo‘u Atua, ‘ina ‘ia fa‘afofoga mai i le vala‘au ma le tatalo, o lo‘o tatalo atu ai lau ‘au‘auna i ou luma;
20. ‘ina ‘ia silasila mai ou fofoga i lenei fale i le ao ‘atoa ma le po, o le mea na e fetalai mai ai, ‘e te tu‘u i ai lou suafa; ‘ina ‘ia e fa‘afogafoga mai i le tatalo e tatalo atu ai lau ‘au‘auna i lenei mea.
21. ‘ia e fa‘afofoga mai i le ‘ai‘oi atu a lau ‘au‘auna ma lou nu‘u o Isaraelu, pe a latou tatalo atu i lenei mea; ‘ia e fa‘afofoga mai fo‘i mai le lagi, o le mea o lo‘o e afio ai; ‘ia e fa‘afofoga mai ma ‘ia e fa‘amāgalo mai.
22. “‘Āfai e agasala se tasi tagata i le tasi tagata, ma ‘ua fai atu o ia ‘iā te ia na te faia se tautoga, ‘ina ‘ia tautō ai o ia, a o‘o mai fo‘i le tautoga i luma o lou fatafaitaulaga i lenei fale;
23. ‘ia e fa‘afofoga mai mai le lagi ma ‘ia e faia le fa‘amasinoga i au ‘au‘auna, e taui atu i lē ‘ua amioleaga, ‘ia tauia lana amio ‘iā te ia lava; e ta‘uamiotonuina fo‘i lē ‘ua amiotonu, ‘ia tu‘uina atu ‘iā te ia e tusa ma lana amiotonu.
24. “A fasia lou nu‘u o Isaraelu i luma o ē ita mai, ‘ina ‘ua latou agasala atu ‘iā te oe; a latou toe fo‘i mai ma ta‘uta‘u atu lou suafa ma tatalo ma ‘ai‘oi atu i ou luma i lenei fale;
25. ‘ia e fa‘afofoga mai oe mai le lagi ma e fa‘amāgalo mai le agasala a lou nu‘u o Isaraelu ma e fa‘afoisia mai i latou i le lau‘ele‘ele na e foa‘iina mai ‘iā te i latou ma o latou tamā.
26. “A punitia le lagi ma ‘ua leai se timu, ‘ina ‘ua agasala atu i latou ‘iā te oe; ‘āfai latou te tatalo i le mea nei ma latou ta‘uta‘u atu lou suafa ma liliu ‘ese ‘iā latou agasala, pe a e fa‘atigā ‘iā te i latou;
27. ‘ia e fa‘afofoga mai oe i le lagi ma e fa‘amāgalo mai le agasala a au ‘au‘auna ma lou nu‘u o Isaraelu, pe a a‘oa‘oina i latou e oe i le ala lelei latou te sāvavali ai; ma ‘ia e foa‘i mai le timu i luga o lou lau‘ele‘ele, na e foa‘iina mai i lou nu‘u e fai mo latou tofi.
28. “‘Āfai e i ai i le nu‘u se oge, ‘āfai e i ai se fa‘ama‘i, ‘āfai e i ai le mamae, po o le polopologā, o le sē akerise, po o le anufe ‘ae ‘āfai e si‘osi‘oina i latou i le nu‘u o i ai a latou ‘a‘ai e i latou o ē ita mai; so se mala, po o se ma‘i e i ai,
29. o talosaga uma ma ‘ai‘oi uma e fai e se tasi tagata, po o lou nu‘u o Isaraelu uma, o ē ‘ua iloa ta‘ito‘atasi o lona ma‘i ma lona tigā ma fa‘aloaloa ona lima i lenei fale;