1. E valu tausaga o Iosia ‘ina ‘ua fai o ia ma tupu; ‘ua fai fo‘i o ia ma tupu i Ierusalema i tausaga e tolu sefulu ma le tasi.
2. Na faia e ia le amiotonu i luma o le ALI‘I ma ‘ua savali i ala o Tavita lona tamā, e le‘i ‘alo ‘ese i le itū taumatau, po o le itū tauagavale.
3. O le tausaga e valu fo‘i o lana nofoa‘iga, ‘ina o taule‘ale‘a pea o ia, ‘ua amata ai e ia ‘ona sā‘ili i le Atua o Tavita lona tamā; o le tausaga fo‘i e sefulu ma le lua ‘ua ia amata ai ‘ona fa‘amamāina o Iuta ma Ierusalema e te‘a ai mea maualuluga ma tupua o Asaira ma tupua ‘ua ta ma tupua u‘amea.
4. ‘Ua latou lepetia fo‘i fatafaitaulaga o Paala i ona luma; ‘ua ia vavae i lalo tupua o le la sa i o latou luga a‘e ma nutipalaina e ia o tupua o Asaira ma tupua ‘ua ta ma tupua u‘amea ma ‘ua fai ai ma efuefu ma ‘ua lūlū ai i luga o latou tu‘ugamau e na fai taulaga i ai.
5. ‘Ua susunuina e ia o ivi o ositaulaga i luga o latou fatafaitaulaga ma ‘ua fa‘amamāina Iuta ma Ierusalema.
6. Sa fa‘apea ‘ona faia i ‘a‘ai o Manase ma Efaraima ma Simeona, ‘ua o‘o atu i Nafatali ‘iā latou mea gaogao i itū uma.
7. ‘Ua lepetia e ia o fatafaitaulaga ma tupua o Asaira ma ‘ua tu‘inini‘ia tupua ‘ua ta e fai ma efuefu, ma ‘ua vavae i lalo o tupua uma o le la i le nu‘u uma o Isaraelu; ‘ona toe fo‘i mai ai lea o ia i Ierusalema.
8. O le sefulu ma le valu o tausaga o lana nofoa‘iga ‘ina ‘ua fa‘amamāina e ia o le nu‘u ma le fale, ‘ona ia ‘a‘auina atu ai lea o Safana le atali‘i o Asalaia ma Maaseia le ali‘i o le ‘a‘ai ma Ioaa le atali‘i o Ioaasa o le fatua‘iupu, e toe teuteu le fale o le ALI‘I lona Atua.
9. ‘Ua latou o‘o mai ‘iā Hilikia le ositaulaga sili, ‘ona latou avatu ai lea o tupe na ‘aumaia i le fale o le Atua, na fa‘apotopotoina e sa Levī, o ē na leoleo i le faitoto‘a, nai lima o Manase ma Efaraima ma ē ‘ua totoe uma o Isaraelu ma Iuta uma ma Peniamina, ‘atoa ma ē ‘ua nonofo i Ierusalema.
10. ‘Ua latou avatu ai i le ‘au faigaluega ē na pule i le fale o le ALI‘I ma latou avatu ai i ē fai galuega e galulue i le fale o le ALI‘I, e toe fa‘aso‘o ai le fale.
11. ‘Ona latou avatu ai lea i tufuga ma tufuga ati fale o fa‘atau a‘i ma‘a talai ma la‘au e fa‘aso‘o a‘i ma ia fai ma la‘au fa‘alava mo fale na fa‘ataugāina e tupu o Iuta.
12. ‘Ua faia e tagata le galuega ma le fa‘amaoni; ‘ua pule ‘iā te i latou o Iata ma Opetaia, o sa Levī, ai le fānauga a Merari; o Sakaria fo‘i ma Mesulama, ai le fānauga Koato, e leoleo ai; ma sa Levī, o ē popoto uma i la‘aupese.
13. ‘Ua latou pule fo‘i i ē ‘ave avega ma leoleo ‘iā te i latou uma o ē fai galuega i galuega ‘ese‘ese; o isi o sa Levī sa fai ma tusi‘upu ma faipule ma leoleo faitoto‘a.