19. ‘Ua ‘a‘auina atu fo‘i e ia o perofeta ‘iā te i latou e toe fa‘afoisia mai i latou i le ALI‘I; ma ‘ua latou a‘oa‘i atu ‘iā te i latou; a ‘ua lē fa‘alogo mai lava i latou.
20. ‘Ona o‘o mai lea o le Agaga o le Atua ‘iā Sakaria le atali‘i o Ieoiata le ositaulaga, ‘ua tu fo‘i o ia i luga o le nu‘u ma fai atu ‘iā te i latou. O lo‘o fa‘apea ‘ona fetalai mai o le Atua, “Se a le mea tou te soli ai poloa‘iga a le ALI‘I, e le manuia ai ‘outou? ‘Ua tu‘ua e ‘outou o le ALI‘I, o le mea lea ‘ua tu‘ua ai ‘outou e ia.”
21. ‘Ona fōua lea o ia e i latou ma latou fetogi ‘iā te ia i ma‘a i le lotoā o le fale o le ALI‘I, ‘ina ‘ua fai atu ai le tupu.
22. ‘Ua lē manatua e le tupu o Ioasa le alofa o Ieoiata lona tamā ‘iā te ia, a ‘ua ia fasiotia lona atali‘i. ‘Ua fai mai fo‘i o ia ‘ina a oti, “E silasila mai le Atua, ma na tauia.”
23. ‘Ua uma le tausaga, ‘ona ō a‘e lea o ‘au a Suria e tau ma ia; na latou ō mai i Iuta ma Ierusalema ma fa‘aumatia ali‘i o le nu‘u a‘i le nu‘u ma ‘ua avatua i le tupu o Tamaseko a latou mea uma na vetea.
24. Auā na ō mai ‘au a Suria e to‘aitiiti tagata, a ‘ua tu‘uina atu e le ALI‘I o ‘au e matuā tele lava i o latou lima, auā ‘ua latou tu‘ua le ALI‘I le Atua o latou tamā. ‘Ua latou fa‘ao‘o le sala ‘iā Ioasa.
25. ‘Ua latou ō ‘ese ‘iā te ia (auā ‘ua tele ‘ona ma‘i ‘ina ‘ua tu‘ua o ia e i latou,) ‘ona fōua lea o ia e ana ‘au‘auna ‘ona o le toto o atali‘i o Ieoiata le ositaulaga ma latou fasioti ‘iā te ia i lona moega, ‘ona oti ai lea o ia; ‘ua latou tanumia fo‘i o ia i le ‘a‘ai a Tavita, a ‘ua latou le tanua o ia i tu‘ugamau o tupu.
26. O i lā‘ua nei na fōua o ia; o Sapata o le tama tane a Semea o le Amoni ma Iosapa le tama tane a Someri o le Moapi.
27. O le tala fo‘i i ona atali‘i ma le tele o avega na fa‘ae‘e ‘iā te ia ma le fa‘avaeina o le fale o le Atua, fa‘auta, ‘ua tusia i le tala o i le tusi i tupu. ‘Ona soloa‘i ane lea o Amasia lona atali‘i e fai ma tupu.