10. ‘Ona fiafia lea o ali‘i uma ma le nu‘u uma, ‘ua latou ‘aumai a latou taulaga ma lafo i le ‘atola‘au, ‘ua o‘o ‘ina ‘atoa.
11. O le aso na ‘aumai ai le ‘atola‘au, e sa Levī i ē leoleo mea a le tupu ma ‘ua latou iloa e tele tupe, ‘ona ō mai lea o le tusi ‘upu a le tupu ma le ‘au‘auna a le ositaulaga sili e sasa‘a le ‘atola‘au ma toe ‘ave i le mea na tu‘u ai. Sa fa‘apea ‘ona faia e i latou i lea aso ma lea aso ma latou fa‘aputu ai tupe e tele.
12. ‘Ona avatu ai lea e le tupu ma Ieoiata i ē na galulue i le faiga o le galuega o le fale o le ALI‘I ma totogi ai i ē talai ma‘a ma tufuga, e toe teuteu ai le fale o le ALI‘I ma ē faigaluega fo‘i i u‘amea ma ‘apamemea, e toe teuteu ai le fale o le ALI‘I.
13. ‘Ua galulue le ‘au ositaulaga, ‘ua uma ‘ona fai e i latou le galuega, ‘ua latou toe faia le fale o le Atua pei ona tuga tuai ma ‘ua latou fa‘amalosia.
14. ‘Ua uma a latou galuega, ‘ona latou ‘aumaia lea o tupe na totoe i luma o le tupu ma Ieoiata, ‘ona latou fai a‘i lea o ipu mo le fale o le ALI‘I, o ipu e ‘au‘auna a‘i ma osi taulaga a‘i ma ipu e asu a‘i, o ipu auro fo‘i ma ipu ario. ‘Ona latou fai ai lea o taulaga mū i le fale o le ALI‘I e lē aunoa i aso uma o Ieoiata.
15. ‘Ua toeaina lava Ieoiata ma ‘ua tu‘u tulu‘i lona ola, ‘ona oti lea o ia. E tasi le selau ma le tolugafulu ona tausaga ‘ina ‘ua oti o ia.
16. ‘Ua latou tanumia o ia i le ‘a‘ai a Tavita fa‘atasi ma tupu, auā na ia faia le mea lelei ‘iā Isaraelu ‘iā le Atua, ‘atoa ma lona fale.
17. ‘Ua mavae le oti o Ieoiata, ‘ona ō mai lea o ali‘i o Iuta ma latou ifo i le tupu. ‘Ona fa‘alogo ai lea o le tupu ‘iā te i latou.
18. ‘Ua tu‘ua e i latou le fale o le ALI‘I le Atua o latou tamā ma latou ‘au‘auna i tupua o Asaira ma isi tupua. ‘Ona o‘o mai ai lea o le to‘asā ‘iā Iuta ma Ierusalema, ‘ona o la latou agasala lea.
19. ‘Ua ‘a‘auina atu fo‘i e ia o perofeta ‘iā te i latou e toe fa‘afoisia mai i latou i le ALI‘I; ma ‘ua latou a‘oa‘i atu ‘iā te i latou; a ‘ua lē fa‘alogo mai lava i latou.
20. ‘Ona o‘o mai lea o le Agaga o le Atua ‘iā Sakaria le atali‘i o Ieoiata le ositaulaga, ‘ua tu fo‘i o ia i luga o le nu‘u ma fai atu ‘iā te i latou. O lo‘o fa‘apea ‘ona fetalai mai o le Atua, “Se a le mea tou te soli ai poloa‘iga a le ALI‘I, e le manuia ai ‘outou? ‘Ua tu‘ua e ‘outou o le ALI‘I, o le mea lea ‘ua tu‘ua ai ‘outou e ia.”