1. E fitu tausaga o Ioasa ‘ina o fai o ia ma tupu; ‘ua fai fo‘i o ia ma tupu i Ierusalema i tausaga e fa sefulu. O le igoa o lona tinā fo‘i o Sevi o le Peresepa.
2. ‘Ua faia fo‘i e Ioasa le amiotonu i luma o le ALI‘I i aso uma o Ieoiata le ositaulaga.
3. ‘Ua ‘aumaia e Ieoiata o avā e to‘alua mā ia. Na fānaua fo‘i ona atali‘i ma ona afafine.
4. ‘Ua mavae ia mea, ‘ona loto lea o Ioasa e toe teuteu le fale o le ALI‘I.
5. ‘Ona fa‘apotopotoina lea e ia o le ‘au ositaulaga ma sa Levī, ‘ua fa‘apea atu ‘iā te i latou, “Ō atu ia ‘outou i ‘a‘ai o Iuta ma fa‘aputu tupe mai ‘iā Isaraelu uma e toe teuteu a‘i le fale o lo ‘outou Atua i lea tausaga ma lea tausaga, ‘ia fa‘avave fo‘i e ‘outou lenei mea.” A ‘ua lē fa‘avaveina lava e sa Levī.
6. ‘Ona ‘a‘ami lea e le tupu o Ieoiata, o lē ‘ua sili, ma na fa‘apea atu ‘iā te ia, “Se a le mea ‘ua e lē fai atu ai i sa Levī e ‘aumai mai Iuta ma Ierusalema le taulaga, e tusa ma le poloa‘iga a Mose le ‘au‘auna a le ALI‘I ma le fa‘apotopotoga o Isaraelu mo le fale fetāfa‘i o le tulafono.”
7. Auā na sofaia le fale o le Atua e tama tane a Atalia, le fafine amio leaga ma latou avatu fo‘i ‘iā Paala mea fa‘apa‘iaina uma o le fale o le ALI‘I.
8. ‘Ua fai atu fo‘i le tupu, ‘ona latou faia lea o le ‘atola‘au ma tu‘u ai i fafo i le faitoto‘a o le fale o le ALI‘I.
9. ‘Ona latou tala‘i atu ai lea i Iuta ma Ierusalema e ‘aumai i le ALI‘I le taulaga na poloa‘i mai ai Mose le ‘au‘auna a le Atua ‘iā Isaraelu i le vao.
10. ‘Ona fiafia lea o ali‘i uma ma le nu‘u uma, ‘ua latou ‘aumai a latou taulaga ma lafo i le ‘atola‘au, ‘ua o‘o ‘ina ‘atoa.
11. O le aso na ‘aumai ai le ‘atola‘au, e sa Levī i ē leoleo mea a le tupu ma ‘ua latou iloa e tele tupe, ‘ona ō mai lea o le tusi ‘upu a le tupu ma le ‘au‘auna a le ositaulaga sili e sasa‘a le ‘atola‘au ma toe ‘ave i le mea na tu‘u ai. Sa fa‘apea ‘ona faia e i latou i lea aso ma lea aso ma latou fa‘aputu ai tupe e tele.
12. ‘Ona avatu ai lea e le tupu ma Ieoiata i ē na galulue i le faiga o le galuega o le fale o le ALI‘I ma totogi ai i ē talai ma‘a ma tufuga, e toe teuteu ai le fale o le ALI‘I ma ē faigaluega fo‘i i u‘amea ma ‘apamemea, e toe teuteu ai le fale o le ALI‘I.