6. ‘ua fa‘apea atu, “Le ALI‘I e, le Atua o matou tamā, e lē o le Atua ‘ea oe i le lagi? ‘E te lē pule ‘ea oe i mālō uma o nu‘u ‘ese? E lē o i lou ‘a‘ao ‘ea le mana ma le malosi, e lē mafaia e se tasi ‘ona tete‘e atu ‘iā te oe?
7. E lē o lo matou Atua ‘ea oe, na e tulia i latou sa nonofo i lenei nu‘u i luma o lou nu‘u o Isaraelu ma ‘ua e foa‘iina mai ai i le fānau a Aperaamo lau uō e fa‘avavau?
8. ‘Ua latou nonofo ai ma fai ai mo oe le malumalu mo lou suafa, sa fa‘apea atu,
9. ‘‘Āfai e o‘o mai mea leaga ‘iā te i matou, o le pelu, po o le sala, po o le fa‘ama‘i, po o le oge ma matou tutū i luma o lenei fale, ‘atoa ma ou luma, auā o i ai lou suafa i lenei fale ma matou vala‘au atu ‘iā te oe i lo matou puapuagā, ‘ona e fa‘afofoga mai ai lea ma fa‘aola mai.’
10. O lenei fo‘i, ‘ia e sisila mai, o le fānauga a Amoni ma Moapi ma le mauga o Seira, o i latou na e lē mafai ‘ona tu‘u mai ‘iā Isaraelu ‘ia osofia i latou, ‘ina ‘ua latou ō mai mai le nu‘u o Aikupito, a ‘ua latou ‘alo ‘ese ‘iā te i latou ma ‘ua lē fa‘aumatia i latou;
11. silasila ‘iā i latou, ‘ua fa‘apea ‘ona latou taui mai ‘iā te i matou, ‘ua ō mai e tutuli ‘iā te i matou ai lou tofi na e foa‘i mai mo i matou.
12. Lo matou Atua e, ‘e te lē fa‘amasino ‘ea ‘iā te i latou? Auā e leai so matou malosi e tete‘e i lenei vao tagata e to‘atele, ‘ua ō mai e tau ma i matou; ‘ua matou lē iloa fo‘i se mea e fai; a ‘ua fa‘asaga atu i matou ‘iā te oe.”
13. ‘Ua tutū Iuta uma i luma o le ALI‘I ma o latou tamaiti, o a latou avā ma a latou fānau.
14. ‘Ona o‘o mai lea o le Agaga o le ALI‘I i luga o Iaaseelu i totonu o le fa‘apotopotoga, o ia o le atali‘i o Sakaria, o le atali‘i ia o Penaia, o le atali‘i ia o Ieielu, o le atali‘i ia o Matania, o lo sa Levī, o lo le fānauga a Asafo;
15. ‘ua ia fa‘apea atu, “O ‘outou Iuta uma ma ē ‘ua nonofo i Ierusalema ma oe le tupu o Iosefatu, ‘inā fa‘afogafoga mai ia ‘outou, o lo‘o fa‘apea ‘ona fetalai mai o le ALI‘I ‘iā te ‘outou: ‘‘Aua ne‘i fefefe, ‘aua fo‘i ne‘i matata‘u ‘outou, ‘ona o lenei vao tagata e to‘atele; auā o le o lo ‘outou tau‘a lenei, a o lo le Atua.
16. ‘Ia ‘outou ō ifo taeao ‘iā te i latou; fa‘auta, ‘ua ō a‘e i latou i le ā‘ega i Sesa; tou te maua fo‘i i latou i le mea e taunu‘u ai le alia e feagai ma le vao o Ieruelu.
17. E le tau ‘outou i lenei tau‘a; tutū ia ‘outou ma ‘ia ‘outou tumau ma ‘outou va‘ai atu i le olataga mai i le ALI‘I o lo‘o ‘iā te ‘outou; Iuta ma Ierusalema e.’ ‘Aua le fefefe, ‘aua fo‘i le matata‘u; ‘ia ō atu taeao ‘iā te i latou; e ‘iā te ‘outou fo‘i o le ALI‘I.”
18. ‘Ona punou lea o Iosefatu i lalo i le ‘ele‘ele; ‘ua fa‘apa‘ū fo‘i Iuta uma ma ē ‘ua nonofo i Ierusalema i luma o le ALI‘I, ‘ua ifo atu i le ALI‘I.
19. O sa Levī, o le fānauga a sa Koatō ma le fānauga a sa Korū, ‘ua tutū i latou e vivi‘i i le ALI‘I le Atua o Isaraelu i le leo tele ma le maualuga.
20. ‘Ua latou ala tula‘i i le taeao ma ō atu i le vao o Tikoa; o lo‘o ō atu i latou, ‘ona tu atu lea o Iosefatu, ‘ua fa‘apea atu, “Iuta e ma ‘outou e nonofo i Ierusalema, fa‘alogologo mai ia ‘iā te a‘u. ‘Inā fa‘atuatua ia i le ALI‘I lo ‘outou Atua, ‘ona fa‘atumauina lea o ‘outou; ‘ia ‘outou fa‘atuatua i ana perofeta, ‘ona ‘outou manuia ai lea.”
21. ‘Ua ia filifili ma le nu‘u, ‘ona tofia lea e ia o ē pepese i le ALI‘I ma ē vivi‘i atu ‘ua ‘iā i latou teuga pa‘ia, i lo latou ō atu i luma o ‘au ma latou fai atu,“‘Ia fa‘amanū atu i le ALI‘I,auā e fa‘avavau lona alofa.”
22. ‘Ua latou amata ‘ona pepese ma vivi‘i atu, ‘ona tu‘u atu lea e le ALI‘I o ‘au ‘ua tanu e tau ma le fānauga a Amoni ma Moapi ma le mauga o Seira, na ō mai e tau ma Iuta; ‘ua fasia i latou.