Feagaiga Tuai

Feagaiga Fou

2 Nofoaiga a Tupu 16:1-14 O LE TUSI PA'IA - Ekalesia Katoliko Roma (RSCB)

1. O le tolugafulu ma le ono o tausaga o le nofoa‘iga a Asa, ‘ua alu a‘e ai Paasa le tupu o Isaraelu i Iuta, ‘ua ia faia fo‘i o Rama, ‘ina ‘ia lē mafai ai se tasi ‘ona sau pe alu atu ‘iā Asa le tupu o Iuta.

2. ‘Ona ‘aumai lea e Asa o ario ma auro i ‘oloa o le fale o le ALI‘I ma le fale o le tupu, ‘ua avatua fo‘i ‘iā Peniata le tupu o Suria, o lē sa nofo i Tamaseko, ‘ua fa‘apea atu,

3. “O lo‘o ‘iā te i tā‘ua le feagaiga ma oe, o lo‘u tamā fo‘i ma lou tamā; fa‘auta, ‘ou te avatua ‘iā te oe o ario ma auro; ‘inā e maliu mai ia ma tatala la ‘oulua feagaiga ma Paasa le tupu o Isaraelu, ‘ina ‘ia alu ‘ese ia ‘iā te a‘u.”

4. ‘Ona fa‘alogo lea o Peniata i le tupu o Asa ma ‘ia ‘a‘auina atu o ē ‘avea ana ‘au i ‘a‘ai o Isaraelu; ‘ua latou fasia Iono ma Tanu ma Apelamaima ma ‘a‘ai uma o Nafatali e tu‘u ai ‘oloa.

5. ‘Ua fa‘alogo ai Paasa, ‘ona tu‘ua lea e ia ‘ona faia o Rama ma ‘ua lē toe faia lana galuega.

6. ‘Ona ‘ave lea e le tupu o Asa o Iuta uma; ‘ona latou ‘ave ‘ese ai lea o ma‘a o Rama ma ona la‘au na fai ai galuega e Paasa; ma ‘ua fai a‘i e ia o Kipea ma Mesepa.

7. O ona po ia na alu atu ai o Hanani le tagata va‘ai ‘iā Asa le tupu o Iuta ma ‘ua fa‘apea atu ‘iā te ia, “‘Ua e fa‘alagolago i le tupu o Suria, a ‘ua e lē fa‘alagolago i le ALI‘I lou Atua, o le mea lea ‘ua sao ai le itūtau‘a a le tupu o Suria a‘i lou lima.

8. E lē o le itūtau‘a tele ‘ea o Aitiope ma Lipua, sa i ai kariota ma ‘au e ti‘eti‘e i solofanua e matuā tele lava? A ‘ua tu‘uina mai i latou i lou lima, ‘ina ‘ua e fa‘alagolago i le ALI‘I.

9. Auā o fofoga o le ALI‘I e fetaufetulia‘i i le lalolagi uma, na te fesoasoani ‘iā te i latou o ē ‘ua sao o latou loto ‘iā te ia. ‘Ua e fai fa‘avalea lenei mea; o lenei, e āfua i ona po nei ‘ona i ai o tau‘a ‘iā te oe.”

10. ‘Ona ita lea o Asa i le tagata va‘ai ma ‘ua tu‘u atu ‘iā te ia i le fale puipui; auā na ita ‘iā te ia ‘ona o lea ‘upu. ‘Ua fa‘asauā fo‘i Asa i nisi o le nu‘u i ia ona po.

11. Fa‘auta fo‘i, o mea na faia e Asa, o mea muamua ma mea mulimuli, fa‘auta, ‘ua tusia i le tusi i tupu o Iuta ma Isaraelu.

12. Na ma‘i fo‘i Asa i ona vae i le tolugafulu ma le iva o tausaga o lana nofoa‘iga, ‘ua o‘o ‘ina tele o lona ma‘i; a ‘ua lē sā‘ili o ia i le ALI‘I i lona ma‘i, a ‘ua sā‘ili i foma‘i.

13. ‘Ona ta‘oto lea o Asa fa‘atasi ma ona tamā, ‘ua oti o ia i le fagafulu ma le tasi o tausaga o lana nofoa‘iga.

14. ‘Ua latou tanu fo‘i o ia i ona tu‘ugamau, na ia ‘elia mo ia i le ‘a‘ai a Tavita ma ‘ua fa‘ata‘oto ‘iā te ia i luga o le moega ‘ua tumu i mea manogi ma mea ‘ese‘ese ‘ua saunia i le faiva o lē fai mea manogi; ma ‘ua latou mūina le afi e matuā tele lava mo ia.#

Faitau le mataupu e atoatoa 2 Nofoaiga a Tupu 16