9. Ma ‘ua fa‘amafanafana ‘iā te i latou i ‘upu o le tulafono ma le ‘au perofeta, o fa‘amanatu fo‘i i tau‘a na latou mua‘i faia ma ‘ua na fa‘amausalīina atili ai i latou.
10. ‘Ua uma ‘ona fa‘amalosia o latou loto i ana ‘upu, ‘ona ia fa‘aali fo‘i lea ‘iā te i latou o le amio pepelo a nu‘u ‘ese ma le soli o a latou tautoga.
11. ‘Ua na tu‘u atu ‘iā i latou ta‘ito‘atasi le ‘au‘upega, e lē o le puipui o le talitā ma le tao, a o ‘upu e sili ‘ona lelei ‘atoa ma apoapoa‘iga, ‘ona ia fa‘amatala fo‘i lea ‘iā i latou lana miti ‘ua tatau lava ‘ona matuā talitonu i ai, ‘ua na fa‘afiafia ai o i latou uma.
12. O le mea lenei na fa‘aalia ‘iā te ia: O Onia, lē na mua‘i ositaulaga sili, o le tagata amio lelei ma le agamalū ma le fofoga mamalu, o le tagata amiotonu ma le mālie lava ana fa‘amatalaga, na ia fa‘asaga talu lona itiiti i le tausiga o le amiotonu uma, o lenei ‘ua fa‘aloaloa ona lima ma tatalo mo le nu‘u ‘atoa o tagata Iutaia;
13. mulimuli ane ‘ua aliali mai ma le tasi tagata, ‘ua ofoofogia lava lona mamalu ma le tele o ona tausaga, o si‘omia o ia i le mamalu matuā tele.
14. ‘Ona faia lea e Onia o ‘upu nei: “O le tagata lenei ‘ua alofa tele i le ‘au uso ma le nu‘u o Isaraelu; o le tagata lenei ‘ua saga momoli talosaga e tele mo le nu‘u ma le ‘a‘ai pa‘ia ‘atoa, o Ieremia lenei, le perofeta a le Atua.”
15. ‘Ae fa‘aloaloa e Ieremia lona lima taumatau ma tu‘u mai ‘iā Iuta se pelu auro, o fa‘apea mai:
16. “‘Ia e tali le pelu pa‘ia, o le mea alofa a le Atua, ‘e te fa‘ato‘ilaloina a‘i o ē ‘ua fai ma fili o lo‘u nu‘u o Isaraelu.”
17. ‘Ua fa‘amafanafanaina i latou i ‘upu matuā mālie a Iuta, ‘ua fa‘aoso ai le loto tele ma fa‘amausalīina ai o loto o taulele‘a, ‘ona tonu lea ‘iā te i latou ‘ia tau le tau‘a ma ‘ia tauivi ma le loto tele, ‘ina ‘ia fa‘ai‘uina loa le mea i lo latou malosi, auā le faigatā ‘ua tupu mo le ‘a‘ai pa‘ia ma le malumalu.
18. Auā sa itiiti lo latou popole mo a latou avā, ma latou fānau mo latou fo‘i uso, a o lo latou popole muamua ma le tele, o le pa‘ia o le malumalu ne‘i solia.
19. A o tagata sa i le ‘a‘ai, ‘ua lē itiiti fo‘i lo latou atu mo i latou o le a tau le tau‘a.
20. Sa fa‘atalitali e i latou uma i se fa‘ai‘uga ‘ia vave maua; ‘ua o‘o lava ‘ina fa‘apotopoto le fili ma ‘ua fa‘avasegaina la latou ‘au, o tutū i tulaga lelei o elefane ma ē ti‘eti‘e i solofanua.
21. ‘Ua iloa atu e Makapaio lea itūtau‘a e to‘atele, ma o latou ‘au‘upega mata ‘ese‘ese ma le mata pāū o elefane, ‘ona ia si‘i a‘e lea ona lima i le lagi ma ‘ua vala‘au atu i le Ali‘i na te faia vāvega, na te lē foa‘iina fo‘i le mālō i le malosi o ‘au‘upega, ‘ae foa‘i lava, e tusa ma lona finagalo malie, ‘iā te i latou e tatau i ai.
22. ‘Ua fa‘apea ‘ona ia tatalo atu ai, “O oe le Ali‘i, ‘ua e ‘auina mai lau agelu, i aso o Esekia le tupu o Iuta ma ‘ua e fa‘aumatia i le togālauapi o Sanerivi o tagata e selau ma le valugafulu ma le lima o afe;
23. o lenei, le Tupu e o le lagi, ‘ia e ‘auina mai lau agelu lelei i o matou luma na te fa‘atupu le mata‘u ma le atu i le mamana o lou ‘a‘ao,
24. ‘ina ‘ia matata‘u ai o i latou ‘ua ō mai i ni ‘upu fāifai e tau ma lou nu‘u pa‘ia.” Na fa‘apea lava ‘ona ia tatalo.
25. O Nikanora ma lana itūtau‘a ‘ua latou oso mai, o pepese ma ili a latou pū.
26. A o Iuta ma ona tagata ‘ua latou sagai i le tau‘a, o vala‘au i le Atua ‘iā latou tatalo.
27. O latou lima sa tau ai, a o latou loto sa tatalo ai i le Ali‘i ma ‘ua latou fasia o tagata e itiiti le tolu sefulu ma le lima o afe, o fiafia tele i latou ‘ina ‘ua tino mai le afio o le Atua.
28. ‘Ua uma le tau‘a ma ‘ua latou fo‘i ma le fiafia, ‘ona latou maua lea le tino o Nikanora ma lona ‘ofu tau, ‘ua fasia lava ia.
29. ‘Ona pā ai lea le ‘alaga ma ‘ua nunununu le ‘au, ma ‘ua latou vivi‘i atu i le Ali‘i mamana i le gagana o o latou tua‘ā.