47. ‘āfai e toe manatu o latou loto i le nu‘u e ‘avea i ai i latou o fa‘atagataotau‘a ma latou liliu mai ma ‘ai‘oi mai ‘iā te oe i le nu‘u e ‘ave i ai i latou fa‘atagataotau‘a, ma latou fa‘apea atu, ‘‘Ua matou agasala ma fa‘api‘opi‘o, ‘ua amio leaga i matou;’
48. ‘āfai latou te liliu mai ‘iā te oe ma o latou loto ‘atoa ma o latou agaga ‘atoa i le nu‘u o ē ita mai ‘iā te i latou, o ē ‘ave ‘iā te i latou fa‘atagataotau‘a, ma latou talotalo ‘iā te oe o fa‘asaga mai i o latou nu‘u na e foa‘iina mai i o latou tamā, o le ‘a‘ai na e filifilia ma le fale ‘ua ‘ou faia mo lou suafa;
49. ‘ia e fa‘afofoga mai mai le lagi, o le mea o lo‘o e afio ai, ‘iā latou tatalo ma a latou ‘ai‘oi, ma ‘ia e fai le fa‘amasinoga mo i latou,
50. ma e fa‘amāgalo mai i lou nu‘u o ē ‘ua agasala atu ‘iā te oe, i o latou solitulafono uma ‘ua latou soli ai au tulafono, ma ‘ia e pule ‘ia alofaina i latou e i latou o ē ‘ave ‘iā te i latou fa‘atagataotau‘a, ‘ia latou alolofa ‘iā te i latou;
51. auā o lou nu‘u ma lou tofi i latou, na e ‘aumaia mai le nu‘u o Aikupito, mai totonu o le ‘ogāumu e tunu ai u‘amea.
52. ‘Ia silasila mai ou fofoga i le ‘ai‘oi a lau ‘au‘auna ma le ‘ai‘oi a lou nu‘u o Isaraelu, ‘ia e fa‘afofoga mai ‘iā te i latou i mea uma latou te vala‘au atu ai ‘iā te oe.
53. Auā le Ali‘i e, le ATUA, na e vavae mai ‘iā te i latou a‘i nu‘u uma i le lalolagi e fai mou tofi, e fa‘apei o lau afioga na ‘aumaia e lau ‘au‘auna o Mose, ‘ina ‘ua e ‘aumai i o matou tamā mai Aikupito.”
54. ‘Ua fa‘aumaina e Solomona ‘ona tatalo i le ALI‘I i lenei tatalo ma lenei ‘ai‘oi uma, ‘ona tula‘i lea o ia mai luma o le fatafaitaulaga o le ALI‘I, sa to‘otuli ai ona tulivae ma fa‘aloaloa a‘e ona lima i le lagi.
55. ‘Ona tu lea o ia ma fa‘amanuia atu i le fa‘apotopotoga uma o Isaraelu ‘ua leo tele, ‘ua fa‘apea atu,
56. “‘Ia fa‘afetaia le ALI‘I o lē ‘ua foa‘iina mai le mālōlōga i lona nu‘u o Isaraelu, e tusa ma mea uma na ia fetalai mai ai, e leai se ‘upu e tasi ‘ua lē taunu‘u o ana ‘upu lelei uma na ia folafolaina mai na fa‘ao‘o mai e lana ‘au‘auna o Mose.
57. ‘Ia ‘iā te i tatou le ALI‘I lo tatou Atua, e pei ‘ona i ai o ia i o tatou tamā; ‘aua ne‘i tu‘ua i tatou e ia; ‘aua fo‘i ne‘i lafoa‘iina i tatou e ia;
58. ‘ina ‘ia fa‘aliliuina e ia o tatou loto ‘iā te ia, ‘ia tatou sāvavali i ona ala uma ma tatou tausi i ana poloa‘iga ma ana tulafono ma ana fa‘amasinoga, na ia poloa‘i mai ai i o tatou tamā.
59. O a‘u ‘upu nei fo‘i ‘ua ‘ou ‘ai‘oi atu ai i luma o le ALI‘I, ‘ia latalata ia i le ALI‘I lo tatou Atua i le ao ‘atoa ma le po, ‘ia faia e ia le fa‘amasinoga mo lana ‘au‘auna ma le fa‘amasinoga mo lona nu‘u o Isaraelu, o le aso ma lana mea;
60. ‘ina ‘ia iloa e nu‘u uma i le lalolagi, o le ALI‘I o le Atua ia, e leai se tasi.
61. O lenei, ‘ia ‘ato‘atoa o ‘outou loto i le ALI‘I lo tatou Atua, e sāvavali i ana tulafono ma tausi i ana poloa‘iga, e fa‘apei ‘ona fai i le aso nei.”
62. ‘Ua fai taulaga le tupu ma le nu‘u uma o Isaraelu fa‘atasi ma ia i luma o le ALI‘I.
63. ‘Ua faia fo‘i e Solomona o le taulaga fa‘afetai, na ia faia i le ALI‘I, o povi e lua sefulu o afe ma afe e lua ma mamoe e selau afe ma afe e luafulu. ‘Ua fa‘apea ‘ona fa‘aulufaleina o le fale o le ALI‘I e le tupu ma le fānauga a Isaraelu uma.
64. O lea lava aso na fa‘apa‘iaina ai e le tupu o le lotoā i totonu i luma o le fale o le ALI‘I; auā na faia e ia i lea mea o taulaga mū ma taulaga i mea e ‘ai, ma le ga‘o o taulaga fa‘afetai; auā sa itiiti le fatafaitaulaga ‘apamemea i luma o le ALI‘I, na lē ofi ai taulaga mū ma taulaga i mea e ‘ai ma le ga‘o o taulaga fa‘afetai.
65. O ona po ia na fai ai e Solomona ma Isaraelu uma fa‘atasi ma ia, o le tausamiga i luma o le ALI‘I lo tatou Atua, o le fa‘apotopotoga tele, e āfua mai i le mea e ui atu ai i Amato, e gata mai i le alia o Aikupito, o po e fitu ma po e fitu, ‘ua ‘atoa ai po e sefulu ma le fa.
66. O lona po valu ‘ua tu‘uina atu ai e ia o le nu‘u; ‘ua latou fa‘amanuia atu fo‘i i le tupu ma latou o i o latou fale ‘ie ma le ‘oli‘oli ma le loto fiafia, ‘ona o mea lelei uma na faia e le ALI‘I mo lana ‘au‘auna o Tavita, ma lona nu‘u o Isaraelu.