4. ‘Ua ‘ava‘e e i latou le ‘atola‘au a le ALI‘I ma le fale fetāfa‘i o le fa‘apotopotoga ma mea pa‘ia uma lava na i ai i le fale fetāfa‘i; ‘ua ‘ava‘e ia lava mea e le ‘au ositaulaga ma sa Levī.
5. O le tupu o Solomona ma le fa‘apotopotoga uma o Isaraelu ‘ua fa‘apotopotoina mai ‘iā te ia, sa i ai i latou ma ia i luma o le ‘atola‘au, o lo‘o fai taulaga i mamoe ma povi, e le masino e lē mafaitaulia fo‘i, auā ‘ua tele lava.
6. ‘Ua ‘ave fo‘i e le ‘au ositaulaga le ‘atola‘au o le feagaiga a le ALI‘I i le mea e tu‘u ai, o le mea e fetalai mai ai o i le fale, o le mea e sili ‘ona pa‘ia, i lalo o ‘apa‘au o kerupi;
7. auā ‘ua fa‘aloaloa e kerupi o la ‘apa‘au e lua i luga o le mea e tu‘u ai le ‘atola‘au; ‘ua fa‘amalumalu fo‘i kerupi i luga o le ‘atola‘au ma luga o ona amo.
8. ‘Ua latou tōsina mai amo, ‘ua iloa fo‘i pito amo i le mea pa‘ia i luma o le mea e fetalai mai ai; ‘ae le‘i iloa i fafo; o lo‘o i ai ‘ua o‘o i ona po nei.
9. ‘Ua lē i ai se mea i le ‘atola‘au, ‘ua na o papama‘a e lua na tu‘uina i ai e Mose i Horepa, ‘ina ‘ua osia le feagaiga e le ALI‘I ma le fānauga a Isaraelu, ‘ina ‘ua latou ō mai mai le nu‘u o Aikupito.
10. ‘Ua ulufafo le ‘au ositaulaga a‘i le mea pa‘ia, ‘ona tumu lea o le fale o le ALI‘I i le ao.
11. ‘Ua lē mafai e le ‘au ositaulaga ‘ona tutū e ‘au‘auna ‘ona o le ao; auā ‘ua tumu le fale o le ALI‘I i le pupula o le ALI‘I.
12. ‘Ona fa‘apea atu lea o Solomona,“Na fetalai mai le ALI‘I,e afio o ia i le pogisā.
13. ‘Ua ‘ou faia lava le fale mo oe ‘e te afio ai,o le afio‘aga ‘e te afio ai e fa‘avavau.”
14. ‘Ona liliu atu lea o le tupu ma fa‘amanuia atu i le fa‘apotopotoga uma o Isaraelu; ‘ua tutū mai fo‘i le fa‘apotopotoga uma o Isaraelu;
15. ‘ua ia fa‘apea atu, “‘Ia fa‘afetaia le ALI‘I le Atua o Isaraelu, o lē na tulei mai lona si‘ufofoga i lo‘u tamā o Tavita ma ‘ua fa‘ataunu‘uina mai i lona ‘a‘ao, ‘ua fa‘apea mai,
16. ‘Talu lava le aso na ‘ou ‘aumai ai lo‘u nu‘u o Isaraelu mai Aikupito, ‘ou te le‘i filifilia se ‘a‘ai i itū‘āiga uma o Isaraelu e fai ai se fale, ‘ina ‘ia i ai lo‘u igoa; a o Tavita ‘ua ‘ou filifilia o ia e pule i lo‘u nu‘u o Isaraelu.’
17. Sa loto fo‘i lo‘u tamā o Tavita e fai se fale mo le suafa o le ALI‘I le Atua o Isaraelu.
18. Na fetalai mai le ALI‘I i lo‘u tamā o Tavita, ‘Auā ‘ua e loto ‘ina fai se fale i lo‘u igoa ‘ua lelei ‘ina ‘ua i ai i lou loto.
19. ‘Ae peita‘i oe, ‘e te lē faia le fale; a o lou atali‘i, o lau lava fānau, o ia na te faia le fale mo lo‘u igoa.’
20. “‘Ua fa‘ataunu‘uina fo‘i e le ALI‘I o lana afioga na ia fetalai mai, ‘ua nofo atu fo‘i a‘u e fai ma sui o lo‘u tamā o Tavita, ‘ua ‘ou ti‘eti‘e fo‘i i le nofoāli‘i o Isaraelu, e fa‘apei ‘ona fetalai mai ai le ALI‘I, ‘ua ‘ou faia fo‘i le fale mo le suafa o le ALI‘I le Atua o Isaraelu.
21. ‘Ua ‘ou saunia fo‘i i ai se mea e tu‘u ai le ‘atola‘au, o lo‘o i ai le feagaiga a le ALI‘I na ia osia ma o tatou tamā ‘ina ‘ua ‘aumaia i latou e ia mai le nu‘u o Aikupito.”
22. ‘Ona tula‘i atu lea o Solomona i luma o le fatafaitaulaga o le ALI‘I, i luma o le fa‘apotopotoga uma o Isaraelu, ‘ua na fa‘aloaloa a‘e fo‘i ona lima i le lagi;