37. “‘Āfai e i ai i le nu‘u le oge, ‘āfai e i ai le fa‘ama‘i, po o le mamae, le polopologā, po o le sē akerise, ‘āfai fo‘i e i ai le sē kasili; ‘āfai fo‘i e si‘osi‘omia i latou i le nu‘u o i ai a latou ‘a‘ai e i latou o ē ita mai; so se mala, po o se ma‘i e i ai;
38. o talosaga uma ma ‘ai‘oi uma e faia e se tagata, po o lou nu‘u o Isaraelu uma; e ta‘itasi uma o ē iloa le tigā o latou loto ma fa‘aloaloa o latou lima i lenei fale;
39. ‘ia e fa‘afofoga mai, mai le lagi, o le mea o lo‘o e afio ai ma e fa‘amāgalo mai ma e faia ma foa‘i mai i tagata ta‘ito‘atasi e tusa ma ana amio uma, ‘ua e silafia lona loto; auā na o oe lava ‘ua e silafia loto o tagata uma lava;
40. ‘ina ‘ia latou matata‘u ‘iā te oe i aso uma latou te ola ai i le lau‘ele‘ele na e foa‘iina mai i o matou tamā.
41. “O le tagata ‘ese fo‘i, e lē so lou nu‘u o Isaraelu, a ‘ua sau o ia mai le nu‘u mamao ‘ona o lou suafa;
42. (auā e fa‘alogo i latou i lou suafa mamalu ma lou ‘a‘ao malosi ma lou ‘a‘ao fa‘aloaloa;) pe a sau o ia, ma tatalo i lenei fale;
43. ‘ia e fa‘afofoga mai mai le lagi, o le mea o lo‘o e afio ai, ma e faia e tusa ma mea uma e vala‘au atu ai le tagata ‘ese ‘iā te oe; ‘ina ‘ia iloa lou suafa e nu‘u uma lava i le lalolagi, ma ‘ia latou matata‘u ‘iā te oe, e fa‘apei o lou nu‘u o Isaraelu, ‘ia latou iloa fo‘i ‘ua igoa i lou suafa lenei fale ‘ua ‘ou faia.
44. “‘Āfai e ō atu lou nu‘u e tau le tau‘a ma ē ‘ua ita mai ‘iā te i latou, i se mea ‘e te ‘a‘auina atu ai i latou ma latou talotalo atu i le ALI‘I o fa‘asaga mai i le ‘a‘ai ‘ua e filifilia ma le fale ‘ua ‘ou faia mo lou suafa;
45. ‘ia e fa‘afofoga mai i le lagi ‘iā latou tatalo ma a latou ‘ai‘oi, ma ‘ia e fai le fa‘amasinoga mo i latou.
46. “Pe ‘āfai latou te agasala atu ‘iā te oe, (auā e leai se tagata e le agasala,) ma e to‘asā mai ‘iā te i latou, ma e tu‘uina i latou i ē ita mai ‘iā te i latou ma latou ‘ave ‘iā te i latou fa‘atagataotau‘a i le nu‘u o ē ita mai, pe mamao pe latalata mai;
47. ‘āfai e toe manatu o latou loto i le nu‘u e ‘avea i ai i latou o fa‘atagataotau‘a ma latou liliu mai ma ‘ai‘oi mai ‘iā te oe i le nu‘u e ‘ave i ai i latou fa‘atagataotau‘a, ma latou fa‘apea atu, ‘‘Ua matou agasala ma fa‘api‘opi‘o, ‘ua amio leaga i matou;’
48. ‘āfai latou te liliu mai ‘iā te oe ma o latou loto ‘atoa ma o latou agaga ‘atoa i le nu‘u o ē ita mai ‘iā te i latou, o ē ‘ave ‘iā te i latou fa‘atagataotau‘a, ma latou talotalo ‘iā te oe o fa‘asaga mai i o latou nu‘u na e foa‘iina mai i o latou tamā, o le ‘a‘ai na e filifilia ma le fale ‘ua ‘ou faia mo lou suafa;
49. ‘ia e fa‘afofoga mai mai le lagi, o le mea o lo‘o e afio ai, ‘iā latou tatalo ma a latou ‘ai‘oi, ma ‘ia e fai le fa‘amasinoga mo i latou,
50. ma e fa‘amāgalo mai i lou nu‘u o ē ‘ua agasala atu ‘iā te oe, i o latou solitulafono uma ‘ua latou soli ai au tulafono, ma ‘ia e pule ‘ia alofaina i latou e i latou o ē ‘ave ‘iā te i latou fa‘atagataotau‘a, ‘ia latou alolofa ‘iā te i latou;
51. auā o lou nu‘u ma lou tofi i latou, na e ‘aumaia mai le nu‘u o Aikupito, mai totonu o le ‘ogāumu e tunu ai u‘amea.
52. ‘Ia silasila mai ou fofoga i le ‘ai‘oi a lau ‘au‘auna ma le ‘ai‘oi a lou nu‘u o Isaraelu, ‘ia e fa‘afofoga mai ‘iā te i latou i mea uma latou te vala‘au atu ai ‘iā te oe.
53. Auā le Ali‘i e, le ATUA, na e vavae mai ‘iā te i latou a‘i nu‘u uma i le lalolagi e fai mou tofi, e fa‘apei o lau afioga na ‘aumaia e lau ‘au‘auna o Mose, ‘ina ‘ua e ‘aumai i o matou tamā mai Aikupito.”
54. ‘Ua fa‘aumaina e Solomona ‘ona tatalo i le ALI‘I i lenei tatalo ma lenei ‘ai‘oi uma, ‘ona tula‘i lea o ia mai luma o le fatafaitaulaga o le ALI‘I, sa to‘otuli ai ona tulivae ma fa‘aloaloa a‘e ona lima i le lagi.