Feagaiga Tuai

Feagaiga Fou

1 Tupu 5:1-8 O LE TUSI PA'IA - Ekalesia Katoliko Roma (RSCB)

1. ‘Ua ‘a‘auina atu e Hiramo le tupu o Turo o ana ‘au‘auna ‘iā Solomona; auā na ia fa‘alogo ‘ua latou fa‘au‘uina o ia e fai ma tupu e sui a‘i lona tamā; auā sa alofa Hiramo ‘iā Tavita i ona aso uma.

2. ‘Ua alu fo‘i le fe‘au a Solomona ‘iā Hiramo, ‘ua fa‘apea atu,

3. “‘Ua e silafia na lē mafaia e lo‘u tamā o Tavita ‘ona fai o se fale i le suafa o le ALI‘I lona Atua, ‘ona o tau‘a na si‘osi‘oina ai o ia, ‘ina se‘ia tu‘uina ifo i latou e le ALI‘I i lalo i ona alofivae.

4. A o lenei, ‘ua foa‘iina mai ‘iā te a‘u e le ALI‘I lo‘u Atua le filemū i itū uma, ‘ua leai sē ‘ua ita mai, po o se leaga ‘ua tupu.

5. Fa‘auta, ‘ou te manatu e fai se fale i le suafa o le ALI‘I lo‘u Atua, e fa‘apei ‘ona fetalai mai le ALI‘I i lo‘u tamā o Tavita, ‘ua fa‘apea mai, ‘O lou atali‘i, ‘ou te fa‘anofoina i lou nofoāli‘i e fai mou sui, o ia na te faia le fale i lo‘u igoa.’

6. O lenei, ‘ia e fetalai atu, ‘ia latou taia mai ma a‘u o arasi mai Lepanona; e fa‘atasi fo‘i a‘u ‘au‘auna ma au ‘au‘auna; ‘ou te avatu fo‘i ‘iā te oe le totogi mo au ‘au‘auna, e tusa ma mea uma ‘e te fetalai mai ai; auā ‘ua e silafia ‘ua lē o ‘iā te i matou se tagata ‘ua iloa ta la‘au e pei o tagata o Saitonu.”

7. ‘Ua fa‘alogo Hiramo i ‘upu a Solomona, ‘ona fiafia tele ai lea o ia, ‘ua fa‘apea fo‘i o ia, “‘Ua fa‘afetai i le ALI‘I i le aso nei, o lē ‘ua avatua ‘iā Tavita lona atali‘i poto na te pule i lenā nu‘u tele.”

8. ‘Ona sau lea o le fe‘au a Hiramo ‘iā Solomona, ‘ua fa‘apea mai, “‘Ua ‘ou fa‘alogo i mea na sau ai lau fe‘au ‘iā te a‘u; ‘ou te faia mea uma ‘ua e finagalo i ai i la‘au o arasi ma la‘au o perosi.

Faitau le mataupu e atoatoa 1 Tupu 5