10. ‘Ona fai atu lea o ia, “‘Ua ‘ou matuā mā‘elegā a‘u ‘ona o le ALI‘I le Atua o ‘au, auā ‘ua tu‘ua e le fānauga a Isaraelu lau feagaiga, ‘ua latou sōloia i lalo ou fatafaitaulaga, ‘ua fasiotia fo‘i e i latou au perofeta i le pelu, ‘ua toe na o a‘u lava; ‘ua latou fia fasioti fo‘i ‘iā te a‘u.”
11. ‘Ona fetalai mai lea o ia, “‘Inā alu ia oe i fafo, ma e tu i le mauga i luma o le ALI‘I.” Fa‘auta mai, ‘ua afio ane le ALI‘I; o le matagi tetele fo‘i ma le malosi ‘ua lepetia ai mauga ma momomo ai papa i luma o le ALI‘I; e le‘i i ai le ALI‘I i le matagi; ‘ua mulimuli i le matagi o le mafui‘e; e le‘i i ai le ALI‘I i le mafui‘e;
12. e mulimuli i le mafui‘e o le afi; e le‘i i ai le ALI‘I i le afi; e mulimuli i le afi o le leo filemū ma le itiiti.
13. ‘Ua fa‘alogo ai Elia, ‘ona ufiufi ai lea e ia o ona mata i lona ‘ofu tele ma alu i fafo ma tu i le gutu o le ana; fa‘auta, ‘ua o‘o mai ‘iā te ia le leo, ‘ua fa‘apea mai, “Elia e, se a lau mea e fai ‘i‘inā?”
14. ‘Ona fai atu ai lea o ia, “‘Ua ‘ou matuā mā‘elegā a‘u ‘ona o le ALI‘I le Atua o ‘au; auā ‘ua tu‘ua, e le fānauga a Isaraelu lau feagaiga, ‘ua latou sōloia i lalo ou fatafaitaulaga, ‘ua fasiotia fo‘i e i latou au perofeta i le pelu, ‘ua toe na o a‘u lava, ‘ua latou fia fasioti fo‘i ‘iā te a‘u.”
15. ‘Ona fetalai mai lea o le ALI‘I ‘iā te ia, “‘Inā alu ia oe ma toe fo‘i i lou ala i le vao o Tamaseko; pe a e o‘o fo‘i i ai, ‘ia e fa‘au‘uina Asaeli e fai ma tupu o Suria;
16. ma Ieu le atali‘i o Nimese, ‘e te fa‘au‘uina e fai ma tupu ‘iā Isaraelu ma Elisaia le atali‘i o Safata o le Apelemeola, ‘e te fa‘au‘uina e fai ma perofeta e sui a‘i oe.
17. O sē sao i le pelu a Asaeli, e fasiotia lea e Ieu; o sē sao i le pelu a Ieu, e fasiotia lea e Elisaia.
18. A ‘ua ‘ou fa‘atoe ‘iā te a‘u i Isaraelu, e to‘afitu afe, o i latou uma o ē ‘ua lē to‘otuli ‘iā Paala, o i latou uma fo‘i o ē ‘ua lē sogi ‘iā te ia.”
19. ‘Ona alu lea o ia nai lea mea; ‘ua maua fo‘i e ia o Elisaia le atali‘i o Safata, o lo‘o suatia le ‘ele‘ele ma povi e ta‘ilua e sefulu ma le lua na muamua ‘iā te ia; sa i ai o ia i le lua na aupito i tua; ‘ua ui ane Elia ‘iā te ia ma lafo atu ai lona ‘ofu tele i luga ‘iā te ia.
20. ‘Ona tu‘ua lea e ia o povi, ‘ae tuliloa ‘iā Elia, ‘ua fai atu ai, “‘Inā tu‘u mai ia ‘iā te a‘u se‘i matou feasogi ma lo‘u tamā ma lo‘u tinā, ‘ona ‘ou mulimuli atu ai lea ‘iā te oe.”‘Ona fai atu lea o ia ‘iā te ia, “‘Inā alu ia oe, ‘inā fo‘i atu ia; auā se a se mea ‘ua ‘ou faia ‘iā te oe?”
21. ‘Ona toe fo‘i lea o ia nai ‘iā te ia; ‘ua ‘ave fo‘i e ia o povi e lua ma ia fasia; ‘ua tunu fo‘i e ia o la tino i mea na galue a‘i povi ma avatu ai i le nu‘u, ‘ua latou ‘a‘ai ai. ‘Ona tula‘i lea o ia ma alu e mulimuli atu ‘iā Elia, ‘ua ia ‘au‘auna fo‘i ‘iā te ia.#