1. ‘Ua fa‘amatala atu e Aapo ‘iā Iesepela o mea uma na faia e Elia, ‘atoa uma ma lona fasioti i perofeta uma i le pelu.
2. ‘Ona ‘auina atu lea e Iesepela o le ‘avefe‘au ‘iā Elia, ‘ua fa‘apea atu, “‘Ia fa‘apea ‘ona fai e atua ‘iā te a‘u ma ia fa‘aopoopo i ai, pe ‘āfai ‘ou te lē fa‘atatau lou ola ma le ola o so latou, i le itūlā fa‘apenei taeao.”
3. ‘Ua iloa e ia, ‘ona tula‘i lea o ia ‘ua tili ola, ‘ua o‘o o ia i Peresepa i Iuta, ‘ua tu‘ua e ia lana ‘au‘auna i lea mea.
4. A ‘ua alu o ia i le vao, o le sāvaliga o le aso e tasi, ‘ona o‘o ai lea o ia ma nofo i lalo o le ratami; ‘ua ia fa‘atoga atu ‘ia oti o ia, ‘ua fa‘apea atu, “Le ALI‘I e, sōia; ‘ia e ‘ave ‘ese lo‘u ola, auā e lē sili ‘ona lelei o a‘u i o‘u tamā.”
5. ‘Ua ta‘oto ia, ‘ua moe i lalo ifo o le ratami, fa‘auta mai, o le agelu ‘ua pa‘i mai ‘iā te ia ma fai mai ‘iā te ia, “‘Inā tu ia i luga, ‘inā ‘ai.”
6. ‘Ona va‘ai atu lea o ia, fa‘auta, sa i ona ulu le pōtoi areto ‘ua tunu i ma‘a ‘a‘asa ma le ipu vai. ‘Ona ‘ai lea o ia ma inu; ‘ona toe ta‘oto lea o ia.
7. ‘Ona fo‘i fa‘alua mai lea o le agelu a le ALI‘I ma pa‘i mai ‘iā te ia ma fai mai, “‘Inā tu ia i luga, ‘inā ‘ai, auā e mamao le ala.”
8. ‘Ona tu lea o ia i luga, ‘ua ‘ai ma inu; ‘ona alu lea o ia i le malosi ‘ona o lea mea na ‘ai e fagafulu o ao ma le fagafulu o po, ‘ua o‘o lava i Horepa o le mauga o le Atua.
9. ‘Ua o‘o i ai o ia i le ana, ‘ua ia nofo ai; fa‘auta fo‘i, ‘ua o‘o mai ‘iā te ia le afioga a le ALI‘I, ‘ua fa‘apea mai ‘iā te ia, “Elia e, se a lau mea e fai ‘i‘inā?”
10. ‘Ona fai atu lea o ia, “‘Ua ‘ou matuā mā‘elegā a‘u ‘ona o le ALI‘I le Atua o ‘au, auā ‘ua tu‘ua e le fānauga a Isaraelu lau feagaiga, ‘ua latou sōloia i lalo ou fatafaitaulaga, ‘ua fasiotia fo‘i e i latou au perofeta i le pelu, ‘ua toe na o a‘u lava; ‘ua latou fia fasioti fo‘i ‘iā te a‘u.”
11. ‘Ona fetalai mai lea o ia, “‘Inā alu ia oe i fafo, ma e tu i le mauga i luma o le ALI‘I.” Fa‘auta mai, ‘ua afio ane le ALI‘I; o le matagi tetele fo‘i ma le malosi ‘ua lepetia ai mauga ma momomo ai papa i luma o le ALI‘I; e le‘i i ai le ALI‘I i le matagi; ‘ua mulimuli i le matagi o le mafui‘e; e le‘i i ai le ALI‘I i le mafui‘e;
12. e mulimuli i le mafui‘e o le afi; e le‘i i ai le ALI‘I i le afi; e mulimuli i le afi o le leo filemū ma le itiiti.
13. ‘Ua fa‘alogo ai Elia, ‘ona ufiufi ai lea e ia o ona mata i lona ‘ofu tele ma alu i fafo ma tu i le gutu o le ana; fa‘auta, ‘ua o‘o mai ‘iā te ia le leo, ‘ua fa‘apea mai, “Elia e, se a lau mea e fai ‘i‘inā?”
14. ‘Ona fai atu ai lea o ia, “‘Ua ‘ou matuā mā‘elegā a‘u ‘ona o le ALI‘I le Atua o ‘au; auā ‘ua tu‘ua, e le fānauga a Isaraelu lau feagaiga, ‘ua latou sōloia i lalo ou fatafaitaulaga, ‘ua fasiotia fo‘i e i latou au perofeta i le pelu, ‘ua toe na o a‘u lava, ‘ua latou fia fasioti fo‘i ‘iā te a‘u.”
15. ‘Ona fetalai mai lea o le ALI‘I ‘iā te ia, “‘Inā alu ia oe ma toe fo‘i i lou ala i le vao o Tamaseko; pe a e o‘o fo‘i i ai, ‘ia e fa‘au‘uina Asaeli e fai ma tupu o Suria;