1. Sa ‘au‘auna le tama o Samuelu i le ALI‘I i luma o Eli; ‘ua valavala fo‘i le afioga a le ALI‘I i ia ona aso, ‘ua lē fa‘aalia mai so‘o.
2. O ia ona aso sa ta‘oto ai Eli i lona moega; ‘ua afuafua ‘ona popogi o ona mata, ‘ua lē mava‘ai;
3. a o le‘i tineia le lamepa a le Atua, ‘ua ta‘oto Samuelu i le malumalu o le ALI‘I o i ai le ‘atola‘au a le Atua;
4. ‘ona vala‘au lea o le ALI‘I ‘iā Samuelu; ‘ua tali atu o ia, “O a‘u lenei.”
5. ‘Ona momo‘e atu ai lea o ia ‘iā Eli, ma na fai atu ai, “O a‘u lenei, auā na e vala‘au atu ‘iā te a‘u.”A ‘ua fai mai o ia, “‘Ou te le‘i vala‘au; fo‘i ia, ‘inā ta‘oto.” ‘Ona alu atu lea o ia, ‘ua ta‘oto.
6. ‘Ua toe vala‘au fa‘alua le ALI‘I, “Samuelu e!” ‘Ona tula‘i lea o Samuelu, ‘ua alu atu ‘iā Eli, ‘ua fai atu ai, “O a‘u lenei, auā na e vala‘au atu ‘iā te a‘u.”‘Ua fai mai o ia, “Tā e, ‘ou te le‘i vala‘au atu; fo‘i ia, ‘inā ta‘oto.”
7. A o Samuelu e le‘i o‘o ‘inā iloa e ia le ALI‘I, e le‘i fa‘aalia fo‘i ‘iā te ia le afioga a le ALI‘I.
8. ‘Ua toe vala‘au le ALI‘I ‘iā Samuelu, o le fo‘i fa‘atolu lea; ‘ona tula‘i lea o ia, ‘ua alu atu ‘iā Eli, ‘ua fai atu, “O a‘u lenei, auā na e vala‘au atu ‘iā te a‘u.”‘Ona iloa ai lea e Eli ‘ua vala‘au le ALI‘I i le tama.
9. ‘Ona fai mai lea o Eli ‘iā Samuelu, “Alu ia, ‘inā ta‘oto; ‘āfai e vala‘au atu o ia ‘iā te oe, ‘e te fai atu ai, ‘Fetalai mai ia, le ALI‘I e, auā o lo‘o fa‘alogologo atu lau ‘au‘auna.’” ‘Ona alu ai lea o Samuelu, ‘ua ta‘oto i lona moega.
10. ‘Ua afio mai le ALI‘I, ‘ona tu lea ma vala‘au, pei ‘ona lua‘i fai, “Samuelu e, Samuelu e!”‘Ona tali atu lea o Samuelu, “Fetalai mai ia, auā o lo‘o fa‘alogologo atu lau ‘au‘auna.”