23. ‘Ua lē faitauina e Tavita o i latou e lua sefulu o latou tausaga ma ‘ua lē o‘o i ai; auā na fetalai mai le ALI‘I na te fa‘ato‘ateleina Isaraelu e pei o fetū o le lagi.
24. Na amata le faitau e Ioapo le tama a Seruia, ‘ae le‘i fa‘ai‘uina; auā ‘ona o lenā mea na o‘o mai ai le to‘asā ‘iā Isaraelu, ‘ua lē tusia fo‘i le faitau aofa‘i i le tusi o tala i le nofoa‘iga a le tupu o Tavita.
25. Na leoleo ‘oloa o le tupu e Asemau le atali‘i o Atielu; na leoleo fo‘i faupuega mea e ‘ai o i le fanua, ma ‘a‘ai ma faoa ‘a‘ai ma ‘olo, e Ionatana le atali‘i o Usia;
26. na pule Eseri le atali‘i o Kelupo i ē na fai galuega i le fanua e galulue i le lau‘ele‘ele;
27. na leoleo Semi o le Rama i tōvine; o Sapata o le Sefama na leoleo i fua o vine e tu‘u ai i mea e teu ai uaina;
28. o Paala-anana le Keteri na leoleo i la‘au o olive, ma la‘au o sukamoru i mea maulalo; na leoleo fo‘i Ioasa i mea e teu ai suāu‘u;
29. na leoleo Setari le Sarona i povi na tata‘a i Sarona; o Safata fo‘i le atali‘i o Atalai na leoleo i povi i vanu;
30. na leoleo Opili o le sa Isamaelī i kamela; o Ietaia o le Marono na leoleo i asini;
31. na leoleo Iasesa o le sa Akarā i mamoe. O ali‘i uma ia na tausi le ‘oloa o le tupu o Tavita.
32. O Ionatana o le uso o le tamā o Tavita, o le faipule, o le tagata fa‘autauta ma le tusi‘upu; o Ikielu le atali‘i o Hakemoni na i ai i atali‘i o le tupu;
33. o Aitofele fo‘i o le tulafale a le tupu; o Usai le Araki o le uō ia a le tupu.
34. E aupito ane ‘iā Aitofele o Ioiata le atali‘i o Penaia ma Aviata; o Ioapo fo‘i o le pule i ‘au a le tupu.#