8. ‘Ua fa‘alogo Filisitia ‘ua fa‘au‘uina Tavita e fai ma tupu ‘iā Isaraelu uma, ‘ona ō a‘e ai lea o Filisitia uma e sā‘ili ‘iā Tavita. ‘Ua lagona fo‘i e Tavita, ‘ona alu atu ai lea ‘iā te i latou.
9. ‘Ua ō atu fo‘i Filisitia ma ‘ua salalau i latou i le vanu o sa Rafā.
10. ‘Ona fesili atu lea o Tavita i le Atua, ‘ua fa‘apea atu, “‘Ou te alu a‘e ‘ea e tau ma Filisitia? Pe ‘e te tu‘uina mai i latou i lo‘u lima?”‘Ona fa‘apea mai ai lea o le ALI‘I ‘iā te ia, “‘Inā alu a‘e ia, auā ‘ou te tu‘uina atu i latou i lou lima.”
11. ‘Ua latou ō atu i Paala-faresa, ‘ona fafasi lea o Tavita ‘iā te i latou i lea mea; ‘ona fa‘apea mai ai lea o Tavita, “‘Ua osofia e le Atua i lo‘u lima o i latou e faia a‘u ma fili, e pei ‘ona oso mai o le vai.” O le mea lea ‘ua latou fa‘aigoa ai lea mea, O Paala-faresa.
12. ‘Ua latou tu‘ulafoa‘i o latou atua i lea mea; ‘ua fai atu ai Tavita, ‘ona latou susunuina ai lea i le afi.
13. ‘Ua toe fa‘apotopoto fo‘i Filisitia ma salalau i latou i le vanu.
14. ‘Ua toe fesili atu Tavita i le Atua; ‘ona fa‘apea mai lea o le Atua ‘iā te ia, “‘Aua ‘e te mulimuli atu ‘iā te i latou, ‘ia fa‘ata‘amilo ‘iā te i latou ma e alu atu ‘iā te i latou i tala ane o la‘au o peka.
15. A ē fa‘alogologo i le pāūū o le savali mai i tumutumu o la‘au o peka, ‘ona e alu atu ai lea e tau le tau‘a; auā ‘ua muamua atu le Atua i ou luma e fasi i le itūtau‘a a Filisitia.”
16. ‘Ona faia lea e Tavita, e pei ‘ona fetalai mai ai o le Atua ‘iā te ia. ‘Ua latou fasia le itūtau‘a a Filisitia, e āfua i Kipeona e o‘o atu i Kasera.
17. ‘Ua o‘o atu le logo o Tavita i nu‘u uma; ‘ua tu‘u fo‘i e le ALI‘I i nu‘u uma ‘ia matata‘u ‘iā te ia.#