55. O Iosua ‘ua ‘ana‘ana i le afioga a le Atua, ‘ua ‘avea ai o ia ma ta‘ita‘i ‘iā Isaraelu.
56. O Kalepo ‘ua molimau lava ia i luma o le fa‘apotopotoga, ‘ua na maua ai lona tofi.
57. O Tavita, ‘ona o lona agaalofa, ‘ua na maua le nofoāli‘i o le mālō e o‘o i le fa‘avavau.
58. O Elia, i lona matuā mā‘elegā i le tulafono, ‘ua si‘itia ia i le lagi.
59. O Hanania, ma Asaria ma Mesaelu, ‘ona o lo latou fa‘atuatua, ‘ua lavea‘iina i latou ai le afi.
60. O Tanielu, ‘ona o lana amiotonu, ‘ua lavea‘iina o ia a‘i le gutu o leona.
61. “Ma ‘ia fa‘apea ‘ona ‘outou manatua atu i lea tupulaga ma lea tupulaga, auā e lē fano se tasi o i latou uma e fa‘alagolago ‘iā te ia.
62. ‘Aua fo‘i tou te matata‘u i ‘upu a le tagata agasala, auā o lona mamalu, o le otaota lea ma le ilo;
63. o le aso nei ‘ua fa‘amaualugaina ai, a e a taeao e lē toe maua o ia auā ‘ua toe fo‘i i lona lava efuefu ma ‘ua fa‘aumatia ‘ona mānatunatu.
64. O lenei, o‘u atali‘i e, ‘ia ‘outou malolosi ma ‘ia ‘outou fa‘atamatane i le tausiga o le tulafono, auā o le mea lava lea tou te mamalu ai.
65. “O Simona lenei, lo ‘outou uso, ‘ua ‘ou iloa o le tagata fa‘autauta o ia; ‘ia ‘outou fa‘alogo pea lava ‘iā te ia, o ia fo‘i e fai ma ‘outou tamā,
66. a o Iuta Makapaio, ‘ua tino mai lona malosi talu mai lona itiiti, ‘ia ‘avea ma ta‘ita‘i o la ‘outou ‘au; o ia lava na te ta‘ita‘i le tau‘a o le nu‘u.
67. Tou te tōsina mai ‘iā te ‘outou o i latou uma ‘ua tausi i le tulafono; ma ‘ia ‘outou taui ma sui mo lo ‘outou nu‘u.