16. Auā ‘ou te lē mā i le tala lelei ‘iā Keriso; auā o le mana lava lea o le Atua e ola ai i latou uma o ē fa‘atuatua, e muamua le Iutaia, ‘atoa ma le Eleni.
17. Auā ‘ua fa‘aalia mai ai le amiotonu a le Atua i le fa‘atuatua, ‘ina ‘ia fa‘atuatua ai, pei ‘ona tusia, “E ola le tagata amiotonu i le fa‘atuatua.”
18. ‘Ua fa‘aalia mai fo‘i le to‘asā o le Atua mai le lagi i le amio fa‘alēmata‘u ma le amio leaga uma lava a tagata, o ē tāofi i le ‘upu moni ma le amioletonu.
19. Auā o mea a le Atua e mafai ‘ona iloa ‘ua fa‘aalia mai ‘iā te i latou; auā ‘ua fa‘aalia mai e le Atua ‘iā te i latou;
20. auā o ana mea e lē va‘aia talu ‘ona faia o le lalolagi, e va‘aia lava ia i le mafaufau i mea na faia o lona mana lava lea e fa‘avavau ma lona Atua; o lea fo‘i ‘ua lē mautali ai i latou.
21. Auā fo‘i na iloa e i latou le Atua a ‘ua lē vivi‘i ma fa‘afetai atu ‘iā te ia, ‘ia tusa i le Atua; ‘ae peita‘i ‘ua fa‘avaleleaina i latou i lo latou taumasalosaloga, ‘ua fa‘apouliuligia fo‘i o latou loto vālea;
22. ‘ua valea i latou, a o fa‘afiapopoto i latou,
23. ‘ua latou fesuia‘i fo‘i le mamalu o le Atua soifua pea lava ma le fa‘atagata o le tino o le tagata i‘u vale, ma manu felelei, ma manu vaefā, ma mea fetolofi.
24. O lea fo‘i na tu‘uina atu ai i latou e le Atua i le amio leaga, i le tu‘inanau o latou loto, latou te fefa‘aleagaina i o latou lava tino;
25. o i latou ia o ē ‘ua fesuia‘i le ‘upu moni i le Atua ma le ‘upu pepelo; ‘ua latou matata‘u fo‘i ma ‘au‘auna i mea na faia, a ‘ua tu‘ua o ia na na faia, o ia o lē vi‘ia e fa‘avavau. Amene.
26. O le mea lea na tu‘uina atu ai i latou e le Atua i mana‘o e māsiasi ai: auā o latou fafine fo‘i, ‘ua latou fesuia‘i le tu e tatau ma le tu e lē tatau;
27. e fa‘apea fo‘i tane, ‘ua tu‘ua e i latou le tu e tatau i le fafine, ‘ina ‘ua mū i lo latou fēmana‘oa‘i; o tane ‘ua fefaia‘i i latou i mea e māsiasi ai; ‘ua tauia fo‘i i latou i o latou lava tino e tusa ma lo latou sesē.
28. ‘Ua latou lē loto fo‘i e tāofi i le matā‘upu i le Atua, o lea ‘ua tu‘uina atu ai i latou e le Atua i le loto leaga, latou te fai ai mea e lē tusa;
29. o lo‘o tūtūmu i latou i amio leaga uma lava, o le faita‘aga, o le amio ulavale, o le manumanu, o le loto leaga; o lo‘o tumu saisai i le matau‘a, o le fasioti tagata, o le misa, o le ‘ole‘olega, ma le fa‘atautala;