37. ‘Ona tali atu ai lea o Iesu, ‘ua fa‘apea atu ‘iā te i latou, “O lē lūlū le saito lelei, o le Atali‘i lea o le tagata;
38. a o lē fanua, o le lalolagi lea; o le saito lelei, o tagata ia o le mālō; o le titania, o le fānau ia a lē ‘ua leaga;
39. o lē ‘ua ita mai na na lūlūina ia mea, o le tiapolo lea; o le seleselega, o le gata‘aga lea o le lalolagi, o ē selesele, o agelu ia.
40. O lea e pei ‘ona fa‘aputuina ai o le titania ma susunuina i le afi, e fa‘apea fo‘i ‘ona faia i le gata‘aga o lenei lalolagi.
41. E ‘a‘auina atu e le Atali‘i o le tagata ana agelu, latou te fa‘apotopotoina nai lona mālō mea uma e tausuai ai ma ē amio leaga.
42. E lafoina i latou i totonu o le ‘ogāumu ‘a‘asa; e i ai le tagiauē ma le lilivau o nifo.
43. ‘Ona pupula ai lea o ē amiotonu e pei o le lā i le mālō o lo latou Tamā. O lē ‘ua i ai taliga e fa‘alogo ai, ‘inā fa‘alogo mai ia o ia.
44. “E tusa fo‘i le mālō o le lagi i le ‘oa ‘ua natia i le fanua; ‘ua iloa e le tasi, ‘ona nanā ai lea e ia; ‘ua alu fo‘i ma le fiafia ma fa‘atau atu ana mea uma, i le fa‘atau mai ai lea fanua.
45. “E tusa fo‘i le mālō o le lagi ma le tagata fa‘atau ‘oa, ‘ua sā‘ili‘ili penina lelei;
46. ‘ua iloa e ia le tasi penina tau tele, ‘ona alu ai lea o ia, ‘ua fa‘atau atu ana mea uma, i le fa‘atau mai ai lea penina.
47. “E tusa fo‘i le mālō o le lagi ma le ‘upega ‘ua lafo i le vai, ‘ua maua ai i‘a ‘ese‘ese uma.
48. ‘Ua tumu, ‘ona latou toso a‘e ai lea i le matāfaga, ‘ua nonofo ma fafao i‘a lelei i ola, a o i‘a leaga ‘ua lafoa‘i.
49. E fa‘apea fo‘i i le gata‘aga o le lalolagi; e ō atu le ‘au agelu o ē vavae ‘ese i ē amio leaga ma ē amiotonu,
50. ‘ona latou lafoina lea ‘iā te i latou i le ‘ogāumu ‘a‘asa; e i ai le tagiauē ma le lilivau o nifo.”
51. ‘Ona fetalai atu lea o Iesu ‘iā te i latou, “‘Ua ‘outou malamalama ‘ea i nei mea uma?” ‘Ua latou fai mai ‘iā te ia, “Ioe, le Ali‘i e.”
52. ‘Ona fetalai atu lea o Iesu ‘iā te i latou, “O lenei, o tusi‘upu uma o ē ‘ua a‘oa‘oina i le mālō o le lagi, e tusa i latou ma le matai o le ‘āiga, ‘ua ‘aumai mea fou ma mea tuai mai lona tu‘ugā‘oloa.”
53. ‘Ua fa‘ai‘u e Iesu nei fa‘ata‘oto, ‘ona maliu ‘ese ai lea o ia i lea mea.