22. E alu lava le Atali‘i o le tagata e pei ‘ona tofia; a o lea tagata na te fa‘alataina o ia, ‘oi talofa ‘iā te ia!”
23. ‘Ona latou fesu‘ea‘i ai lea, po o ai o latou o le a na faia lea mea.
24. Sa latou fefinaua‘i fo‘i po o ai o latou e sili.
25. A ‘ua fetalai atu o ia ‘iā te i latou, “O tupu o nu‘u ‘ese ‘ua ali‘ita‘i i latou; o ē pule fo‘i ‘iā i latou ‘ua ta‘ua i latou o ē agalelei.
26. ‘Ae lē fa‘apea ‘outou; peita‘i o lē sili ‘iā te ‘outou, ‘ia ‘avea o ia ‘ia pei o lē aupito itiiti; o le pule fo‘i, ‘ia pei o le ‘au‘auna ia.
27. Auā po o ai e sili; o lē nofo ‘ea e ‘ai, po o lē ‘au‘auna mai? O lē e nofo e ‘ai e sili o ia. A o a‘u nei, o lo‘o ‘iā te ‘outou pei o le ‘au‘auna lava.
28. “O ‘outou fo‘i, ‘ua ‘outou tumau ‘iā te a‘u i ‘ou tofotofoga.
29. E fa‘apei ‘ona tofia mai e lo‘u Tamā le mālō ‘iā te a‘u, e fa‘apea fo‘i ‘ona ‘ou tofia ‘outou,
30. ‘ina ‘ia ‘outou ‘a‘ai ma inu i la‘u la‘o‘ai i lo‘u mālō ma ‘ia nonofo i nofoāli‘i ma fa‘amasino atu i itū‘āiga o Isaraelu e sefulu ma le lua.”
31. “Simona e, Simona e, fa‘auta, ‘ua mana‘o tele Satani ‘iā te ‘outou, ‘ia lūlū ‘iā te ‘outou pei o le saito,
32. ‘ae ‘ou te tatalo mo oe, ‘ina ‘ia ‘aua ne‘i vaivai lou fa‘atuatua; a e toe fo‘i mai ‘iā te a‘u, ‘ona e fa‘amalosi ai lea i ou uso.”