39. ‘Ua uma ‘ona faia e i lā‘ua o mea uma e tatau i le tulafono a le Ali‘i, ‘ona fo‘i atu lea i Kalilaia, i la lā‘ua ‘a‘ai o Nasareta.
40. ‘Ua tupu le tama, ma ‘ua malosi lona loto, ‘ua tumu i le poto; ‘ua ‘iā te ia fo‘i le alofa o le Atua.
41. ‘Ua ō i Ierusalema ona mātua i lea tausaga ma lea tausaga i le tausamiga o le paseka.
42. ‘Ua o‘o i ona tausaga e sefulu ma le lua, ‘ona ō a‘e lea o i latou i Ierusalema, e tusa ma le tu o le tausamiga.
43. ‘Ua mavae ona aso, ‘ona fo‘i mai lea o i lā‘ua, a ‘ua nofo le tama o Iesu i Ierusalema, ‘ae le‘i iloa e lona tamā ma lona tinā.
44. Sa manatu i lā‘ua o i le ‘au malaga o ia; ‘ua la po tasi i le ala, ‘ona la sā‘ili lea ‘iā te ia i lo la ‘āiga ma ē na latou masani.
45. ‘Ua lē iloa o ia, ‘ona la fo‘i atu lea i Ierusalema, o sā‘ili ‘iā te ia.
46. ‘Ua mavae aso e tolu, ‘ona la maua ai lea o ia i le malumalu o nofo i totonu o le ‘au a‘oa‘o, o lo‘o fa‘alogologo ‘iā te i latou, ma taufesili ‘iā te i latou.
47. ‘Ua matuā ofo uma lava ē na fa‘alogo ‘iā te ia i lona poto ma ana ‘upu e tali.
48. ‘Ua la ofo ‘ina ‘ua iloa atu o ia e i lā‘ua; ‘ona fai ane lea o lona tinā ‘iā te ia, “La‘u tama e, se a le mea ‘ua e fa‘apea mai ai ‘iā te i mā‘ua? Fa‘auta, o i mā‘ua ma lou tamā sa ma sā‘ili lava ‘iā te oe ma le tigā.”
49. ‘Ona fai atu lea o ia ‘iā te i lā‘ua, “Se a ‘ea le mea na ‘oulua sā‘ili mai ai ‘iā te a‘u? Lua te lē iloa ‘ea e tatau ‘ona ‘ou i le fale, o lo‘u Tama?”