3. ‘Ua ō uma atu fo‘i i latou ‘ia tusia, e ta‘itasi i lana lava ‘a‘ai.
4. ‘Ua alu a‘e fo‘i Iosefa mai Kalilaia, mai le ‘a‘ai o Nasereta, i Iutaia i le ‘a‘ai o Tavita, ‘ua igoa ‘iā Peteleema, auā o le ‘āiga ia ma le gafa o Tavita,
5. ‘ia tusia fa‘atasi ma Maria o lē sa faufautane ‘iā te ia, ‘ua tō o ia.
6. Sa i ai i lā‘ua, ‘ona o‘o lea i ona po e fānau ai o ia.
7. ‘Ua fānau e ia lana tama ulumatua, ‘ua ia aui ‘iā te ia i le ‘ie ma fa‘ata‘oto ‘iā te ia i le fale manu, auā latou te lē ofi i le fale e tali ai mālō.
8. Sa i le vao o lea nu‘u leoleo mamoe, sa nonofo ai ma leoleo pō i lo latou lafu mamoe.
9. Fa‘auta fo‘i, ‘ua tu mai ‘iā i latou le agelu a le Ali‘i, ‘ua pupula fa‘ata‘ali‘oli‘o mai fo‘i ‘iā te i latou le pupula o le Ali‘i, ‘ua matuā fefefe ai lava i latou.
10. ‘Ona fai mai lea o le agelu ‘iā te i latou, “‘Aua tou te matata‘u; auā fa‘auta, ‘ou te ‘aumai ‘iā te ‘outou le tala lelei o le ‘oli‘oli tele e o‘o mai i nu‘u uma,
11. auā o le aso nei ‘ua fānau ai ‘iā te tatou i le ‘a‘ai a Tavita, le Fa‘aola, o ia o Keriso le Ali‘i.
12. O le fa‘ailoga lenei ‘iā te ‘outou, e iloa ai e ‘outou le tama meamea ‘ua aui i le ‘ie, o lo‘o ta‘oto i le fale manu.”
13. ‘Ona fa‘afuase‘i lea ‘ona fa‘atasi mai ma le agelu o ‘au mai le lagi e to‘atele, ‘ua vivi‘i i le Atua, ‘ua fa‘apea ane,
14. “O le vi‘iga i le Atua i mea aupitoaluga;ma le manuia i le lalolagi, i tagata ‘ua alofagia e ia.”
15. ‘Ua ō i le lagi agelu sa ‘iā i latou, ‘ona fetautalatala‘i ai lea o leoleo mamoe, “‘Inā tatou ō ia i Peteleema, tatou te va‘ava‘ai i lenei mea ‘ua faia, ‘ua fa‘ailoa mai ‘iā te i tatou e le Ali‘i.”
16. ‘Ua latou fa‘ata‘alise atu, ‘ona maua lea o Maria, ma Iosefa, ma le tama meamea o ta‘oto i le fale manu.
17. ‘Ua latou iloa, ‘ona latou fa‘ailoa ai lea o le ‘upu na ta‘ua mai ‘iā te i latou i lea tama.
18. O i latou uma ē na fa‘alogo ai, ‘ua ofo i latou i mea ‘ua ta‘ua mai ‘iā te i latou e leoleo mamoe.
19. A o Maria ‘ua tāofi ia ‘upu uma, ‘ua mafaufau i ai lona loto.
20. ‘Ona fo‘i mai lea o leoleo mamoe, o vivi‘i ma fa‘afetai i le Atua, ‘ona o mea uma ‘ua latou fa‘alogo ai ma va‘ai i ai, e pei ‘ona ta‘ua mai ‘iā te i latou.
21. ‘Ua o‘o i le aso valu e peritome ai le tama, ‘ona fa‘aigoaina ai lea o ia o Iesu, na fa‘aigoa ai e le agelu a o le‘i i le manava o lona tinā.