18. O i latou uma ē na fa‘alogo ai, ‘ua ofo i latou i mea ‘ua ta‘ua mai ‘iā te i latou e leoleo mamoe.
19. A o Maria ‘ua tāofi ia ‘upu uma, ‘ua mafaufau i ai lona loto.
20. ‘Ona fo‘i mai lea o leoleo mamoe, o vivi‘i ma fa‘afetai i le Atua, ‘ona o mea uma ‘ua latou fa‘alogo ai ma va‘ai i ai, e pei ‘ona ta‘ua mai ‘iā te i latou.
21. ‘Ua o‘o i le aso valu e peritome ai le tama, ‘ona fa‘aigoaina ai lea o ia o Iesu, na fa‘aigoa ai e le agelu a o le‘i i le manava o lona tinā.
22. ‘Ua ‘atoa ona aso o le fa‘amamāina o ia, e tusa ma le tulafono a Mose, ‘ona la ‘aumai lea ‘iā te ia i Ierusalema, e tu‘uina atu ai i luma o le Ali‘i;
23. pei ‘ona tusia i le tulafono a le Ali‘i, “O tama tane ulumatua uma ‘ia fa‘apa‘iaina i latou mo le Ali‘i;”
24. e avatu fo‘i le taulaga, pei ‘ona fai mai ai le tulafono a le Ali‘i, “O le uluga manutagi, po o tama‘i lupe e lua fua.”
25. Fa‘auta fo‘i, sa i Ierusalema le tagata e igoa ‘iā Simeona; o le tagata amiotonu o ia ma le amioatua, sa fa‘atalitali atu o ia i le fa‘amafanafanaina o Isaraelu; ‘ua i luga ‘iā te ia le Agaga Pa‘ia.
26. ‘Ua uma ‘ona fa‘aalia ‘iā te ia e le Agaga Pa‘ia, na te lē iloa le oti se‘ia mua‘i iloa atu le Keriso o le Ali‘i.
27. O le Agaga ‘ua alu ai o ia i le malumalu; ‘ua ‘aumai le tama o Iesu e ona mātua, ‘ia la faia ‘iā te ia fa‘apei ‘ona tatau i le tulafono,
28. ‘ona sapaia lea e ia i ona lima, ‘ua fa‘afetai atu i le Atua, ‘ua fa‘apea atu:
29. “Le Ali‘i e, ‘e te tu‘uina atu nei lau ‘au‘auna ‘ia alu,ma le manuia, pei o lau afioga;
30. auā ‘ua iloa e o‘u mata le fa‘aolataga mai ‘iā te oe,
31. ‘ua e saunia i luma o nu‘u uma lava.
32. O le malamalama e fa‘amalamalama ai nu‘u ‘ese, ma le mamalu o lou nu‘u o Isaraelu.”
33. ‘Ua ofo lava lona tamā ma lona tinā i mea ‘ua ta‘ua ‘iā te ia.
34. ‘Ua fa‘amanuia atu Simeona ‘iā te i lā‘ua, ‘ua fai atu fo‘i ‘iā Maria lona tinā. “Fa‘auta, ‘ua tu‘u le tama nei e pa‘u‘ū ai ma toe tutū ai tagata e to‘atele o i Isaraelu; e fai fo‘i ma fa‘ailoga e fa‘aleagaina;
35. e tuia fo‘i lou lava loto ‘ia ati i le pelu, ‘ina ‘ia fa‘aalia mai ai manatu o loto o tagata e to‘atele.”