10. ‘Ona fai mai lea o le agelu ‘iā te i latou, “‘Aua tou te matata‘u; auā fa‘auta, ‘ou te ‘aumai ‘iā te ‘outou le tala lelei o le ‘oli‘oli tele e o‘o mai i nu‘u uma,
11. auā o le aso nei ‘ua fānau ai ‘iā te tatou i le ‘a‘ai a Tavita, le Fa‘aola, o ia o Keriso le Ali‘i.
12. O le fa‘ailoga lenei ‘iā te ‘outou, e iloa ai e ‘outou le tama meamea ‘ua aui i le ‘ie, o lo‘o ta‘oto i le fale manu.”
13. ‘Ona fa‘afuase‘i lea ‘ona fa‘atasi mai ma le agelu o ‘au mai le lagi e to‘atele, ‘ua vivi‘i i le Atua, ‘ua fa‘apea ane,
14. “O le vi‘iga i le Atua i mea aupitoaluga;ma le manuia i le lalolagi, i tagata ‘ua alofagia e ia.”
15. ‘Ua ō i le lagi agelu sa ‘iā i latou, ‘ona fetautalatala‘i ai lea o leoleo mamoe, “‘Inā tatou ō ia i Peteleema, tatou te va‘ava‘ai i lenei mea ‘ua faia, ‘ua fa‘ailoa mai ‘iā te i tatou e le Ali‘i.”
16. ‘Ua latou fa‘ata‘alise atu, ‘ona maua lea o Maria, ma Iosefa, ma le tama meamea o ta‘oto i le fale manu.
17. ‘Ua latou iloa, ‘ona latou fa‘ailoa ai lea o le ‘upu na ta‘ua mai ‘iā te i latou i lea tama.
18. O i latou uma ē na fa‘alogo ai, ‘ua ofo i latou i mea ‘ua ta‘ua mai ‘iā te i latou e leoleo mamoe.
19. A o Maria ‘ua tāofi ia ‘upu uma, ‘ua mafaufau i ai lona loto.
20. ‘Ona fo‘i mai lea o leoleo mamoe, o vivi‘i ma fa‘afetai i le Atua, ‘ona o mea uma ‘ua latou fa‘alogo ai ma va‘ai i ai, e pei ‘ona ta‘ua mai ‘iā te i latou.
21. ‘Ua o‘o i le aso valu e peritome ai le tama, ‘ona fa‘aigoaina ai lea o ia o Iesu, na fa‘aigoa ai e le agelu a o le‘i i le manava o lona tinā.
22. ‘Ua ‘atoa ona aso o le fa‘amamāina o ia, e tusa ma le tulafono a Mose, ‘ona la ‘aumai lea ‘iā te ia i Ierusalema, e tu‘uina atu ai i luma o le Ali‘i;
23. pei ‘ona tusia i le tulafono a le Ali‘i, “O tama tane ulumatua uma ‘ia fa‘apa‘iaina i latou mo le Ali‘i;”
24. e avatu fo‘i le taulaga, pei ‘ona fai mai ai le tulafono a le Ali‘i, “O le uluga manutagi, po o tama‘i lupe e lua fua.”
25. Fa‘auta fo‘i, sa i Ierusalema le tagata e igoa ‘iā Simeona; o le tagata amiotonu o ia ma le amioatua, sa fa‘atalitali atu o ia i le fa‘amafanafanaina o Isaraelu; ‘ua i luga ‘iā te ia le Agaga Pa‘ia.
26. ‘Ua uma ‘ona fa‘aalia ‘iā te ia e le Agaga Pa‘ia, na te lē iloa le oti se‘ia mua‘i iloa atu le Keriso o le Ali‘i.
27. O le Agaga ‘ua alu ai o ia i le malumalu; ‘ua ‘aumai le tama o Iesu e ona mātua, ‘ia la faia ‘iā te ia fa‘apei ‘ona tatau i le tulafono,
28. ‘ona sapaia lea e ia i ona lima, ‘ua fa‘afetai atu i le Atua, ‘ua fa‘apea atu:
29. “Le Ali‘i e, ‘e te tu‘uina atu nei lau ‘au‘auna ‘ia alu,ma le manuia, pei o lau afioga;