Le mataupu

  1. 1
  2. 2
  3. 3
  4. 4

Feagaiga Tuai

Feagaiga Fou

Kolose 3 O LE TUSI PA'IA - Ekalesia Katoliko Roma (RSCB)

‘Ia Tatou Loto i Mea o i Lugā

1. O lenei, ‘āfai ‘ua toe fa‘atūina ‘outou fa‘atasi ma Keriso, ‘ia ‘outou sā‘ili i mea o i lugā o i ai Keriso, o lo‘o ti‘eti‘e i le itū taumatau o le Atua.

2. ‘Ia ‘outou loto lava i mea i lugā, ‘ae lē o mea i le lalolagi.

3. Auā ‘ua oti ‘outou, ‘ua lilo fo‘i lo ‘outou ola fa‘atasi ma Keriso i le Atua.

4. Pe a fa‘aali mai Keriso lo tatou ola, ‘ona iloa ai lea o ‘outou fa‘atasi ma ia i le mamalu.

O le Ola Tuai ma le Ola fou

5. O lenei, ‘ia ‘outou fasiotia lo ‘outou itū tino o i le lalolagi, o le faita‘aga, o le amio leaga, o le fa‘amatāitu, o le tu‘inanau leaga, ma le matape‘ape‘a, o le ifo tupua lava lea.

6. O mea ia e o‘o mai ai le to‘asā o le Atua.

7. O ‘outou fo‘i na ‘outou sāvavali ai fo‘i anamua, a o ‘outou nonofo ai;

8. a o ona po nei ‘ia tu‘u ‘ese ai e ‘outou lava o nei mea uma, o le ita, o le lotoa, o le loto leaga, o le ‘upu leaga, ma le ‘upu matagā ai o ‘outou gutu.

9. ‘Aua le fētaupelopeloa‘i, ‘ina ‘ua tō‘eseina e ‘outou le tagata tuai ‘atoa ma ana amio,

10. a ‘ua ‘outou ‘o‘ofu i le tagata fou, o lē ‘ua fa‘afouina i le iloa, e fa‘atatau ‘ia foliga i lē na faia o ia.

11. E lē o i ai se Eleni po o se Iutaia, o sē peritomeina po o sē lē peritomeina, o se tagata o nu‘u ‘ese po o se Sekutia, o se pologa po o se sa‘oloto; a ‘ua ‘iā Keriso mea uma, o i ai fo‘i o ia i mea uma lava.

12. O lenei, ‘ia ‘o‘ofu ‘outou i le alofa mutimutivale, ma le agalelei, ma le loto maulalo, ma le agamalū, ma le ‘onosa‘i, fa‘apei o ē ‘ua filifilia e le Atua, o ē ‘ua pa‘ia ma ‘ua alofaina.

13. ‘Ia fēfa‘apalepalea‘i, ma ‘ia fefa‘amāgāloa‘i ‘outou, pe ‘āfai ‘ua agaleagaina se tasi e se tasi; fa‘apei ‘ona fa‘amāgalo mai Ali‘i ‘iā te ‘outou, ‘ia fa‘apea fo‘i ‘outou.

14. A o le alofa, e lautua lea i nei mea uma, o le fusi lea e ‘ato‘atoa ‘ona lelei ai.

15. ‘Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi ma ‘ia ‘outou saga fa‘afetai.

16. ‘Ia nofo le afioga a Keriso i totonu ‘iā te ‘outou ‘iā tele lava, a o ‘outou a‘oa‘o ma apoapoa‘i le tasi i le tasi i le poto uma lava, a o ‘outou pepese fo‘i i salāmo ma pese, ma siva fa‘aleagaga ma le fa‘afetai i le Atua i o ‘outou loto.

17. O mea uma fo‘i tou te faia i le tautalatala, po o le amio, ‘ia faia uma lava ia mea i le suafa o le Ali‘i o Iesu, ma le fa‘afetai i le Atua le Tamā e ala ‘iā te ia.

O Apoapoa‘iga i le Olaga Fa‘ale‘āiga

18. O ‘outou fafine, ‘ia ‘outou usiusita‘i atu ‘iā ‘outou lava tane, pei ‘ona tatau i le Ali‘i.

19. O ‘outou tane, ‘ia ‘outou alolofa atu ‘iā ‘outou avā, ‘aua fo‘i ne‘i fa‘a‘ono‘ono ‘iā te i latou.

20. O ‘outou le fānau, ‘ia ‘outou fa‘alogo i o ‘outou mātua i mea uma; auā o le mea mālie lea i le Ali‘i.

21. O ‘outou tamā, ‘aua ne‘i fa‘aita ‘iā ‘outou fānau, ‘ina ne‘i fa‘apalapala i latou.

22. O ‘outou pologa, ‘ia ‘outou fa‘alogo i mea uma i o ‘outou matai i la le tino, ‘aua ne‘i fa‘atagā ‘au‘auna, fa‘apei o ē fa‘afiafia i tagata, a ‘ia faia ma le loto fa‘amaoni, o lo‘o matata‘u i le Atua.

23. O mea uma lava tou te faia, ‘ia faia ma le loto, peiseaī ‘ua faia i le Ali‘i, ‘ae lē o tagata.

24. Auā ‘ua ‘outou iloa, e maua e ‘outou mai le Ali‘i o le taui, o le tofi lea; taui ‘ua ‘au‘auna ‘outou i le Ali‘i o Keriso.

25. O lē amioletonu e maua e ia le taui o lana amioletonu; e lē fa‘ailogaina fo‘i se tasi.#